India hmachhawn tur United States Inbuatsaihna a ṭha, kan huphurh lo - Siami

Hockey thuneitu sang International Hockey Federation (FIH) chuan Tokyo Olympic Qualifier-a inhmachhawn tur a tichiang a, India nula ten United States an hmachhawn dawn. Lalremsiami Hmar chuan inbuatsaihna an neih ṭhat avangin an paltlang ngei a beisei thu Vanglaini a hrilh.

Thawhṭanni zan khan FIH hmunpui Lausanne, Switzerland-ah draw hi neih niin, India mipa team chuan Russia an hmachhawn thung dawn a ni. Inelna hi Kalinga Stadium, Bhubaneswar-ah November 1-2 hian neih tur a ni - team ngai pahnih hi ṭum hnih an inhmachhawn ang.

Olympic kalkawng

Summer Olympics 2020-ah hian team 12 an inlan thei dawn. Khawmualpui 

ṭhenhran panga a champion ṭheuh te chu an tling nghal. Argentina (Pan American Games), South Africa (African Olympic Qualifier), Netherlands (EuroHockey Championship), New Zealand (Oceania Cup) leh Japan (Asian Games) te chu an tling sa tawh.

Asia khawmualpui champion Japan hi a thlengtu an ni a, a thlengtu hi tlingsa an nih bawk avangin FIH Olympic Qualifiers aṭanga ram paruk tling tur chu pasarihah a pun belh phah. Siami awmna India hmeichhe team tan Olympic khel turin mahni muala US hneh a ṭul a, mipa lamin Russia an hneh a ngai thung.

Qualifier khel phak tur pawh hian kawng thui tak zawh hmasak a ngai. India nulate hi August thla khan Olympic Test Event-ah an champion avangin qualifier hi an khel thei. Mipa team inlan theih chhan erawh FIH Series Finals-ah champion lo mah se final an luh phak vang a ni.

Mizo tleirawl telna

India nulate hi 2017 khan Asia Cup-ah an champion a, hlawhtlinna an chan ṭum hian Lalremsiami Hmar chu player pawimawh a ni phak tawh. Kolasib tleirawl hi India tan player pawimawh a ni chhunzawm a, Commonwealth Games leh Youth Olympic-ah te a khel ṭha thei hle.

Thla hmasa maia Olympic Test Event an neih khan India hian inelna thlengtu Japan chu final-ah 2-1 in an hneh a, chakna goal hi Siami khung a ni. Asia champion an mualah ngei an luhchhuah thei tihna a ni a, inrintawkna sang tak nen qualifier an khel thei dawn.

September 8, Pathiannia world ranking chhuak tharah India hmeichhe team hi world number 9 an ni a, tun 

ṭuma an khingpui tur US hi number 13 an ni thung. Mipa team hi number 5 an ni phak, an elpui tur Russia hi 22-na daih an nih avangin India team pahnih tan Olympic luhna kawngka a inhawng zau.

Beiseina

India team hian Sports Authority of India, Bangalore-ah ngawrh takin training an nei mek. Thawhṭanni khan fitness test neih niin player tin an fit ṭha tawk a, tunah hian September thla tawp lama England hmachhawn turin inbuatsaihna an nei. England nen hian inenchhin nan match nga an khel dawn a ni.

Youth Olympic silver medalist Siami chuan, "Inbuatsaihna hi kan nei ṭha khawp mai, nitin ngawrh takin training kan nei reng. Tunah hian sawi lawk theih chu ni lo mah se kan tum ram kan thlen theih ka beisei," tiin US an paltlang theih a rin thu a sawi.

India coach Sjoerd Marijne chuan, "Kei chuan kan elpuiten eng angin nge an khelh tih hi ka ngaihtuah ber a ni ngai lo. Kan team hian eng anga ṭhain nge kan khelh chhuah theih tih hi a pawimawh hmasa zawk chu a ni," a ti. Captain Rani Rampal pawhin Tokyo Olympics 2020 khelh ngei an tum thu a sawi bawk.



Share this Post

Login to comment
No Comments