Sri Lanka player 10 an inhnukdawk

Pakistan-a one day international leh Twenty20 cricket tour nei turin Sri Lanka inbuatsaih mek mah se player 10 chu venhimna chungchangah an inhnukdawk. 

Sri Lanka player inhnukdawk zingah hian player langsar Dimuth Karunaratne, Lasith Malinga leh Angelo Mathews-te pawh an tel a, Pakistan tan thu hriat nuam a ni lo. 

Ruahman ang chuan Sri Lanka hian September 27-ah ODI match-in bul an ṭan ang a, October 9-ah twenty20-ah an match hnuhnung ber an khel ang. 

Hmanah chuan...

Kum 2009 khan Sri Lanka hian Pakistan-ah tour an lo nei tawh a, silai kengin Sri Lanka team chuanna bus an bei. 

He beihna avang hian civil mi pahnih an thi a, venhim hna thawktu mi paruk an thi tel bawk. Sri Lanka player thi erawh an awm lo a, parukin hliam 

an tuar thung. 

Kum 2009-a thil thleng avang hian Pakistan hian an khelmualah series puitling an khel leh tawh lo a, tuna Sri Lanka zin tur hi a hmasa ber tur a ni ang. 

Tichuan...

Sri Lanka cricket thuneitute lam chuan player-te hi a hma thil thleng avang hian Pakistan-a zin ngei turin an nawr lui lo a, duhthlanna an kutah an nghat. 

Hetiang a nih takah chuan ODI captain Karunaratne, T20 captain Malinga leh captain hlui Mathews hnungzuiin Niroshan Dickwella, Kusal Perera, Dhananjaya de Silva, Thisara Perera, Akila Dhananjaya, Suranga Lakmal leh Dinesh Chandimal an inhnukdawk ve leh a ni. 

Sri Lanka Cricket thu chhuak chuan player-te hnenah hian venhimna pek dan tur an hrilhfiah vek thu an sawi a, mahse duhthlanna an pek ang ngeiin player 10 hi an inhnukdawk. 

A pawi lo

Pakistan Cricket thuneitute lam chuan Sri Lanka player 10 ngawt inhnukdawk mah se buaina an neih loh thu an sawi a, a pangngai angin inbuatsaihna an kalpui. 

Hming tarlan loh, Pakistan cricket thuneitu zinga mi chuan, "Sri Lanka lam buaina a ni a, keini chuan engmah sawi tur kan nei lo. Ruahman sa angin engkim kan kalpui 

a ni," a ti. 

Sri Lanka hian December-a Pakistan nen Test khel turin ruahmanna an kalpui bawk a, mahse Pakistan nge UAE-ah an khelh ang, tihah erawh thutlukna an la siam lo. 

Ruahmanna chu 

October, 2017 khan Sri Lanka hian T20 match khat chu Pakistan-ah hian an lo va khel tawh a, kum hnih liam ta chhung khan ICC World XI leh West Indies chu 'short' T20 series khelin an zin 'zuai' tawh bawk. 

Mahse, ODI, Twenty20 leh test series khel kim tur erawhin 2009 hnu khan eng team mah an la kal leh lo a, Pakistan mipuiten rei tak hnuah an rama ODI inkhel an en leh dawn ta. 

Tuna ruahmanna ang chuan Sri Lanka leh Pakistan hian ODI match thum an khel ang a, Twenty20 series match thum an khel bawk ang. 



Share this Post

Login to comment
No Comments