Belgium tan KDB a langsar

Euro 2020 qualifier-ah Belgium tan Kevin de Bruyne a langsar a, 4-0 ngawta Scotland an sawpna inkhelah assist vawi thum a nei a, goal khat a khung bawk!

Romelu Lukaku, Thomas Vermaelen leh Toby Alderweireld te chuan Belgium tan minute 32 chhungin goal khat ṭheuh an khung a, KDB-a siamsak vek a ni. 

Manchester City midfielder hian a siamsaktu ringawt niloin a khungtu nih tel a duh a, minute 82-naah Scotland mualphona belhchhah turin a khung ve leh sak. 

Liverpool left back Andy Robertson hoa khel Scotland hian kawng engkimah Belgium hi an phak lo a ni ber a, KDB ropuina hmaah an thamral. 

Belgium hian Group I-ah match ruk khel tawhin point 18 an nei a, an la tlawm miau loh avangin tling chiangah sawi theih an ni tawh. 

Chhiarkawp danin Scotland-in tlin theih dan la nei mah se 1-0 a Kazakhstan hnehtu Russia hi 15 points neiin pahnihnaah an awm mek a, match ruka vawi hnih chiah la chak Scotland tan beisei a bo angin a sawi theih. 

Scotland manager Steve Clarke chuan, "Kan beiseina a bo tawh. Tunah chuan pathumna nih a, nakkuma playoff khelh chu kan rilruk ber tur a ni ang," 

tiin a sawi. 



Share this Post

Login to comment
No Comments