Subroto Cup U17 Mizoram-in West Bengal hneh

Subroto Cup Under 17 mipa inelnaah Mizoram chuan nimin khan M. Lalpektluanga leh Lalawmpuia te goal hmangin West Bengal 2-1 in an hneh. Vawiin tlai dar 3:30 hian Mizoram hi an match hnuhnung berah International Board Schools Sports Org (IBSO) nen an inkhel ang. 

Mizoram hi group E-ah awmin an match hmasa berah Kerala hminga tel ISL club Kerala Blasters junior team nen 0-0 in an inhnehtawk a, match hnihnaah Bangladesh 13-1 zetin an sawp.

Subroto Cup Under 17 mipa inelnaah hian team 40 chu group riatah panga zela ṭhendarh an ni a, group hmahruaitu chauhin quarterfinal an lut dawn. SYS Football Academy, Lunglei hminga kal Mizoram hi group hmahruaitu ni mek mah se Kerala nen an inhnehtawk avangin an dinhmun a la him bik lo.

Kerala hian vawiin tlai dar 2:00 hian West Bengal an hmachhawn ang a, naktuk tlai dar 4:00-ah Bangladesh nen an inkhel leh ang.



Share this Post

Login to comment
No Comments