MPL leh mimal lawmman Pa Roa a chawl tawh, mi thar an awm zel

Mizoram Premier League Season 8-na chu September 5 hian khelh ṭan a ni dawn. Season sarih khelh zawh ni tawhin kum sarih liam taa vanglai hun hmangte kha tun season-ah hmuh turin la awm bawk mah se, ṭhahnem tak chu khelmualah an hmel hmuh tur an awm tawh lo.

Pa Roa zunzam

Mizoram Premier League ṭan tirh khan club pali Dinthar FC, Luangmual FC, FC Kulikawn leh Mizoram Police te chu First division aṭangin playoff khelh ngai loin MPL-ah hlankai nghal an ni.

Police team hi 1st Bn MAP leh 3rd Bn MAP inzawm khawm an ni a, 1st Bn Football Academy erawh Aizawl DFA first division-ah dah thlak an ni.

MPL Playoff aṭangin club dang pali Aizawl FC, Chanmari FC, Reitlang FC leh FC RS Annexe te an inpet tling a, top flight football-a team paruk awm ṭhin chu team pariata tihlen a nih tak avangin player ṭha an vang hle.

Mizo football club hlun FC Kulikawn chuan ballboot khai tawh Lengpui player ṭha Rohmingthanga chu boot bun leh turin an thlem thlu a, Mizo player talent nei ṭha bik hi club football-ah a rawn let.

Pa Roa hi MPL-ah player satliah ni loin Lammuala grass phah a nih hma ruahsur vanga field a diak ṭuma a ball thiamna zawng zawng nen a rawn kir a, a khup vei lam tuamna 'pawl' kha a rawn chhawm tel vek.

Lammual bûng hnuaia inkhel entute mit rawn titlai nawnin Pa Roa hian FC Kulikawn chu palina a nihpui a, MPL hmasa ber best midfielder-ah thlan a ni.

Lengpui chhuanvawr hian Aizawl FC a zawm a, Mizo club I League-a hruai thlengtute zinga mi niin National Games-ah Mizoram a champion pui bawk.

Lengpui tan kumin NECS Cup leh CYMA Football-ah rawn inlanin semifinal leh last 16 a thlenpui. CYMA Football zawh khan Vanglaini hnenah football khelh a chawhsan thu a sawi a, MPL leh tualchhung football thlir 

ṭhin chuan Pa Roa zunzam hi an theihnghilh tawh lo ang.

AwP-a record

MPL hmasa paliah Lalawmpuia'n best goalkeeper chawimawina a hui vek. Aizawl Venglai tlangval AwP-a hian Chanmari FC tan khelin vawi thum thlan a nih hnuah Zo United-ah insawnin chawimawina a dawng chhunzawm a, he record ropui tak hi khum a harsa tawh ang.

Best goalkeeper ni tawh zingah BVT keeper Malsawmdawngzela chu kumin MPL-ah hmuh a ni dawn lo a, chutih rualin inelna hnuhnunga best goalkeeper 

F. Lalmuanawma (Mizoram Police) leh 

T. Zothanmawia (Chanmari FC) bakah AwP-a (Aizawl FC) te chu chawimawina dawng thei tur zinga mi an ni. 

Mi thar an rawn chhuak a nih chuan I Day Football best goalkeeper RS Lallawmzuala (FC Venghnuai) hming sawi hmaih a thiang lo a, Electric Veng goalkeeper pahnih Lalmuansanga leh Lalrinnunga te erawh an inluh chhawk chho zel a nih chuan mimal lawmman dawn a harsa ang.

Bang rinawm

MPL hmasa pahnih best defender Zothanpuia leh R. Laldinliana-te chuan Services leh ISL club Chennaiyin FC te an zawm tawh a; foreigner dawng hmasa ber Emmanuel Chigozie leh Lalhlimpuia te ziahluh zingah an tel lo.

Season liam taa best defender PC Laldinpuia chuan Electric Veng FC zawm mah se transfer-ah fel lo a awm avangin MFA Super Cup leh I Day Football-ah a inlan lo a, MPL-ah erawh a fel hman beisei a ni.

Lalrinchhana Tochhawng pawh MPL-a bul a ṭanna Chanmari FC-ah a let tawh a, coach S. Malsawmtluanga hnuaiah rinrawl a ni ang. Best defender chawimawina dawng thei tur hi inelna ṭan hnuah chauh a hriatthiam chhoh dawn a, tlarhnung lam hi mi thar ṭha rawn chhuak tur an tam dawn niin a lang.

Goal siamsaktute

Best midfielder-a thlan hmasa pahnih Rohmingthanga leh Reuben Zosangpuia te hmuh tur an awm dawn lo a, K. Lalṭhathanga pawh ISL club NorthEast United-ah a khel mek.

Midang pali - David Lalrinmuana, 

R. Malsawmtluanga, Lalruatfela Zote leh Alfred Kemah Jaryan te erawh an inlan vek dawn.

Liberian midfielder Alfred-a'n Aizawl FC jersey a rawn ha dawn a, AFC nena inhmeh tak David erawh Chanmari FC tan a rawn khel dawn a, Fela Zote-in coach Lalsangzuala Hmar hnung zuiin Electric Veng FC tan a khel dawn a, MS-a pawh a ṭum hnih nan Mizoram Police tan 

a inlan ang.

Goal khungtute

Best forward atana thlan tawh mi pali chiah an awm a; F. Lalrinpuia (Valpuia), MS Dawngliana leh Malsawmfela ten vawi hnih ṭheuh an dawng tawh a, H. Lalmuankima'n vawi khat a dawng tawh bawk.

Mizoram Police tan Valpuia leh Sawmfela te an inlan dawn a, Chanmari FC tan Bawngkawn tlangval pahnih Dawngtea leh MK-a te an khel thung ang. 



Share this Post

Login to comment
No Comments