Sindhu, Saina leh Srikanth an tlang

Badminton World Federation hnuaia inelna lian leh ngaihhlut BWF World Championships khelh laiah Indian shuttler an chefuh chhunzawm zel a, medal la thei tura beisei - PV Sindhu, Saina Nehwal leh Kidambi Srikanth te chuan an khingpui ṭheuh hnehin third round an inhlangkai.

Sindhu chu

Nilaini zan khan Basel, Switzerland-ah Indian shuttler-te hi an inlan a, silver medal vawi hnih la tawh Sindhu hian Pai Yu Po chu 21-14, 21-14 in a hneh. India nula hi awlsam takin a chak angin a lang, mahse court-a minute 43 hun a hman chhung erawhin a thawkrim hle.

World number 45 Yu Po hian game khatna a hloh hnuah pawh a beidawng lo a, game hnihnaah bul ṭan fuh zawkin a tir lamah chuan 6-1 in hma a hruai thei hial. Amaherawhchu, Sindhu-i'n 15-13 in a tlan pel hnuah a zawnin point thum a hmu a, a tawp thlengin a hawikir tawh lo.

Rio Olympic silver medalist Sindhu-i'n a match lehpekah chuan Beiwen Zhang a hmachhawn dawn. Seeded pakuana Zhang hian inkhel dangah Hsuan-Yu Wendy Chen chu 21-14, 21-13 in a hneh. Sindhu nen vawi sarih an intawn tawhah ṭum li hnehna a chang thei a, nikum khan Indian Open quarterfinal-ah a ngam bawk avangin Hyderabad nula tan fimkhur a ngai ang.

Saina leh Srikanth

Hliam vanga a chawlh reng hnuah Saina Nehwal a rawn inlan leh thei tawh a, London Olympic bronze medalist hian Soraya de Visch Eijbergen chu minute 33 chhung chauhin 21-10, 21-11 in a hneh - harsa lo takin second round a paltlang a ni. Seeded pariatna Saina hian third round-ah chuan Denmark nula, seeded 12-na Mia Blichfeldt a hmachhawn leh ang.

Mipa singles lamah Kidambi Srikanth chuan fiahna hautak a paltlang. World number 1 hlui hian minute 57 zet an inkhelh hnuah Misha Zilberman chu 13-21, 21-13, 21-16 in a hneh hram, seeded 12-na Kantaphon Wangcharoen nen an inkhel leh dawn a ni.

Hmeichhe doubles lamah erawh Ashwini Ponnappa leh Sikki Reddy te chu 22-20, 21-16 in seeded pasarihna Du Yue leh Li Yin Hui te ṭangdun lakah an tlawm a, Jakkampudi Meghana leh Poorvisha S Ram te an chak loh bawk avangin hemi huanga Indian shuttler awmte an tla kim.



Share this Post

Login to comment
No Comments