Assam-ah electric bus 1,000 tlan tir tum

Assam State Transport Corporation (ASTC) leh Hungary based Csepel Holding a Indian distributer-te ṭang­kawp chuan Assam-ah electric bus 1,000 kumin kum tawp lamah tlan tir tura peih hman an tum.

ASTC managing director Anand Prakash Tiwari chuan inbiakna chu zawh fel vek a nih tawh thu sawiin, inremna pawh an ziah vat dawn thu a sawi. "Csepel company chuan a capital an rawn tum dawn a, bus, charging station leh a enkawlna tur zawng zawng pawh an rawn tum dawn. Mahse keini lam ve thung chuan thla tinin pawisa kan rulh ve a ngai ziah dawn thung a ni," a ti.

Thla tharah hian FAME (Faster Adop­tion and Manufacturing of Hybrid and Electric Vehicles) scheme hnuaiah electric bus 15 leh charging station pahnih Assam-ah hian tlan tir tura ruahman a ni a, Ka­makhya Temple kawnga tlan tir tum a ni.

A thawh hnihna atan FAME scheme hnuaiah tho hian sorkar laipui chuan Assam-ah electric bus 100 tlan tir turin a ruahman bawk a, heng zinga bus 50 chu Guwahati-ah tlan tir tum a ni a, bus 25 ve vete chu Jorhat leh Silchar-ah tlan tir an ni ang.

FAME scheme hnuaiah hian sorkar laipuiin 60% senso a tum dawn a, state sorkar-in a bak zawng chu a tum ang.



Share this Post

Login to comment
No Comments