Sikkim SDF MLA 10-in BJP an zawm

Sikkim-a eptu party Sikkim Democratic Front (SDF) MLA 10 zet chuan nimin khan New Delhi-ah Bharatiya Janata Party (BJP) an zawm.

BJP an zawmnaah hian party working president JP Nadda leh general secretary Ram Madhav-te pawh an awm a ni.

SDF hian kum 25 chhung zet chu an hotupa Pawn Kumar Chamling kaihhruaina hnuai­ah sorkarna an siam thei a, Cham­ling pawh hi India rama chief minister ni rei thei ber a ni hial. Mahse kumin inthlan zawhah khan Sikkim Krantikari Morcha (SKM) hneh loin eptu lamah an 

ṭang ta thung.

Sikkim dinhmun

Hmarchhak state zingah Sikkim chiah hi BJP emaw North East Democratic Alliance (NEDA)-a a thawhpui emaw ten sorkarna an siam theih lohna awmchhun a ni a, kumin state assembly inthlanah thleng khan BJP hian seat pakhat pawh an la thei lo. Chumai a ni lo, kumin assembly inthlana an vote share kha 1.62% chiah a ni a, hetih lai hian SDF vote share chu 47.63% niin sorkarna siam mek SKM hian vote 47.03% an hmu thung.

Sorkarna siam mek SKM ai pawhin SDF hi an vote percentage chu a sang zawk a, inthlan zawh boruak thlir phei chuan by-election neihte a la ngai dawn bawk nen SDF hian sorkarna siam leh mai an inbeisei a nih kha. 

Niminah erawh thil danglam a thleng a, seat 32 awmna Sikkim assembly-ah hian SDF hian seat 15 an la a ni. Mahse heng zinga 10 zet hian BJP an zawm ta si a, SDF chief Pawan Chamling tan chuan a luhai thlak viauin a rinawm. Mi ṭhenkhat chuan BJP hi a zawm ve mai ringte pawh an awm a ni. BJP chuan seat engmah nei lo aṭangin seat 10 an nei nghal tihna a ni a, SDF erawh chuan seat panga chiah an nei ta thung. Seat panga an nei tihah hian seat hnih hi by-election neih a la ngai a, SDF hian an dinhmun dik takah chuan MLA pathum chiah an nei.

BJP GS a lawm

BJP general secretary Ram Madhav chuan, "SDF hian Sikkim-ah kum 25 chhung zet ro an rel tawh a, tunah chuan an MLA tam zawk in BJP an zawm ta. Sikkim-a eptu pawl nia mawhphurhna awmte kan tihlawhtling ang a, Sikkim-a kan party kan tichak lehzual dawn a ni,"  tiin a sawi.

Sikkim MLA, BJP zawm zinga mi Dorjee Tshering Lepcha pawhin Sikkim state mipuite leh voter naupang zawkte chuan prime minister Modi kaihhruaina Sikkim-ah BJP 

ṭhang se an duh thu a sawi ve bawk. 



Share this Post

Login to comment
No Comments