Manipur Maoist hotupa man

Bihar khawpui Patna-ah Manipur leh Patna police ṭang­kawpin Maoist Communist Party Manipur (MCPM) hotu Sapamcha Kangleipal leh midang pahnih an man a, Pathianni khan Manipur-ah thawn kir an ni.

Hardinge Road bula Patna Junction-ah MCPM hotu Sapamcha Kangleipal hi kum 11 zet a bikbo hnuah man a ni a, KCP Peoples’ War Group (PWG) hruaitu pahnihte pawh man tel an ni bawk. 

Patna court-in phalna a pek hnuah thlawhtheihnain Imphal-a thawn kir an ni. Kangleipal hi Indigo flight-a thawn kir a ni a, midang pahnih erawh thlawhtheihna danga thawn kir an ni thung.

Kangleipal hi sorkar laka a hel vangin Manipur police-ten kum 2008 May khan an man a, hetih hunlai hian human rights protection kawnga hnathawktu pawl Mani-pur Forward Youth Front (MFYF)-ah president ni lai mek a ni.

A damloh avangin kum 2008 December 28 leh 29 khan Imphal-a Jawaharlal Nehru Institute of Medical Sciences (JNIMS) dawmdawi-inah dah a ni a, security ward aṭangin Kangleipal hi a tlan chhuak a ni. A tlan chhuah hnu hian underground a zawm a, Maoist Communist Party Manipur (MCPM) chu a din a, Manipur-a communist society tundin a nih theihnan hmalatu pawl an ni.

Police-te chuan Imphal East chief judicial magistrate hnenah nimin khan a inlan tur thu hi an sawi a, FIR case la tih fel loh a neihte nen a thubuai hi ngaihtuah sak a ni ang.

Midang KCP (PWG) hruaitu pahnih an mante hi Imphal West chief judicial magistrate hmaah an inlan dawn a, Lamphel Police Station-a FIR  thehluh a nih angin an chungthu hi ngaihtuah an ni dawn bawk.



Share this Post

Login to comment
No Comments