Hmarchhak helpawlten I-Day boycott an tum

Manipur-a helpawl hrang hrang intelkhawm, Coordination Committee (CorCom) leh United Liberation Front of Asom-Independent (ULFA-I) chuan August 15-a Independence Day lawm-na chu boycott an tum tih an sawi.

CorCom leh ULFA-I chuan thuchhuah inṭawm siamin, hmarchhak mipuite chu India Independence Day lawm ve lo turin an ngen a, August 15 hian zing dar 1.30 aṭanga zan dar 6.30 thleng nawrh an huaihawt dawn tih an sawi. Mahse nawrh huaihawt hian medical service, electricity leh water supply, fire service leh sakhaw thil pawimawhte erawh a huam lo ang. 

Thuchhuah an siamah hian India-in British awpna aṭanga zalenna a hmuh rual khan, Western South East Asia (WESEA) pawhin zalenna an nei ve nghal tih an sawi. Mahse he bial hi British-ten an chhuahsan rualin, India roreltute chuan tihluihna leh bumna hmangin heng bialte hi chhunfin an nihna turin hma an la zui a, bial 

ṭhenkhat phei chu sipai chakna hmanga lak hial an ni, an ti. WESEA huamchhung bialte chu an tihpum hnuah, an lo inrelbawl dante tihbo sakin, a leilung fate ngei chu India kuta tlulut leh innghat lo thei loin an siam ta a ni, tiin an thuchhuah chuan a tarlang. A leilung fate tihdan phung leh culture-te chu Hindu kalphung anga thlaksak tuma beih a la ni reng a, Hindi ṭawngte tilarin Hindi ṭawng hmang Indian-ten an chim mek a ni, a ti. 

India chuan WESEA leilung fate lakah inthliarhranna a kalpui mek tih sawiin, RSS-BJP thupui 'one nation, one religon and one language' chu theihtawpa beih let a ngai tih an sawi. 

Tun hnaia Jammu and Kashmir mipuite remtihna leh ngaih­dan pawh la hmasa loa Constitution Article 370 tihtawp chuan India invaivung zia leh democracy kalphung a zah loh zia a tilang a ni, tiin an sawi bawk. State thuneihnate titawp a, hruaitu pawimawh tak takte house arrest-a hren zui ang bawka thil tenawm hi hmarchhak mipuite chungah pawh an la ti duh ngei ang tih a langchiang a ni, an ti. 



Share this Post

Login to comment
No Comments