Sorkarin Tripura helpawl inremna ziahpui Cadre 88 inpe dawn

Sorkar laipui, Tripura sorkar leh National Liberation Front of Tripura (NLFT) chuan kar kal ta Inrinni khan New Delhi-ah Memorandum of Settlement (MoS) an ziak. Inremna an siam hmang hian NLFT helpawl cadre 88-te pawh sorkar kutah an inpe dawn tih official thuchhuah chuan a tarlang. 

MoS-ah hian sorkar laipui aiawhin union home ministry joint secretary (North-East) Satyendra Garg, Tripura aiawhin additional chief secretary (Home) Kumar Alok leh NLFT (SD) aiawhin Sabir Kumar Debbarma leh Kejal Debbarma-ten hming an ziak. Inremna ziah a nih hnuah NLFT aiawhte chuan union home minister Amit Shah an hmu nghal a ni. 

Official thuchhuah chuan, NLFT (SD) hian tharum thawhna kawng an zawh chu bansan a, kawng dik zawh leh India ram danpuiin a duh ang anga awm an remti ta tih a sawi. NLFT cadre 88-te chu an ralthuam kawlte nen thuneitute kutah an inpe thuai dawn tih a sawi. 

Sorkar chuan hel pawl hruai­­tute hnenah hel inpete chu Surrender-cum-Rehabilitation Scheme, 2018 angin ham-

ṭhatna pek an ni vek dawn tih a hrilh. "Tripura sorkar chuan hel inpete hi an chenna intur saknaah te, sorkar hnaah an luh theihna turah te, an fate zirna kawngahte a pui zel dawn a ni. Sorkar laipui pawhin Tripura sorkarin an state chhunga tribal area tihhmasawnna tur rawtna a thlente pawh a ngaihtuah bawk ang," a ti. 

NLFT hi kum 1997 

aṭang khan Unlawful Activities (Prevention) Act hnuaiah dan pawnah hnawl an ni. Ram­chhunga firfiak zawnga chetna thleng ṭum 317, security force 28  leh civil mi 62 an thih phah­­naah inhnamhnawiha puh an ni. 

Kum 2015 aṭang khan NLFT nena inremna kawng zawnga inbiakna hi ṭan a ni a, kum 2016 aṭang kha chuan an pawl hian pawikhawihna a thlen zui tawh lo nia sawi a ni. 

Tripura home department official chuan NLFT cadre 88-te hi Independence Day, August 15-ah Agartala-a sorkar kutah an inpe dawn tih a sawi. 

Tun ṭum hi kum 30 chhunga Tripura sorkarin helpawlte inremna a siampui ṭum thumna a ni. Kum 1998 khan sorkar laipui leh Tripura sorkar chuan Tripura National Volunteers (TNV) chu inremna an lo siampui tawh a, kum 1993 khan Tripura Left Front sorkar chuan All Tripura Tribal Force (ATTF) chu inremna a ziahpui tawh bawk. 



Share this Post

Login to comment
No Comments