Tuilianin Kaziranga National Park 90% a chim tawh

Fur ruahtui sur nasa vangin Assam-a Kaziranga National Park (KNP) leh Pobitora Wildlife Sanctuary-te chu tui in a chim deuh vek tawh a, KNP 90% leh Pobitora Wildlife Sanctuary 85% te chu tuiin a chim tawh a ni. 

Tuilen vang hian ramsate chu sahimna zawngin an kal darh nasa hle a, sapeltute leh eitur tlakchham vangin  ramsate dinhmun hi a him lo hle a ni. 

KNP paltlang NH-37 pawh tuiin a chim vek a, lirthei engmah an tlan thei lo. Hriat theih chinah ramsa 23 an thi tawh; sazuk tê chi pariat, sazuk lian chi pakhat leh ramsa dang tuia tlahlum pahnih leh thildang vanga thi parukte an ni. Ramsa tam tak chu hmunsang lamah himna zawngin an kal darh a, heng ramsa rilṭam ṭhenkhat hi Karbi Hills velah NH-37 paltlangin chaw zawngin an chho nual bawk nia hriat a ni. Chaw a vân vangin sapeltute lakah an him lo hle.

Forest official-te chuan KNP a ramsa mang mai hlauhawm tak tak hmun hrang hranga kal darhte chu sapeltute laka an him theih nan Special Rhino Protection Force-te an vah chhuah reng thu an sawi. Principal Chief Conser­vator of Forest (Wildlife) Dr Ran­jana Gupta chuan ramsate venhimna kalpuina hmunah camp siamin a awmchilh reng bawk. Thawhṭanni khan Chief Minister thupek angin minister of state for forest, Naba Kumar Doley chuan he camp hi a tlawh. 

Pobitora Wildlife Sanctuary kalpawhna kawng zawng zawng chu tuilian hian a chim bakah a ti chhe deuh vek a, hei vang hian sanctuary a ramsate dinhmun hi hriatchian theih a ni lo. Tuilian chim chin hian san lam a pan mek zel a ni. 



Share this Post

Login to comment
No Comments