Manipur-ah ILPS phutna kalpui leh dawn

Manipur-a Joint Committee on Inner Line Permit System (JCILPS) chuan an state-a Inner Line Permit System (ILPS) hman phuta an hmalakna chu an kalpui chhunzawm leh dawn tih an sawi. 

Thawhṭanni khan Manipur-a ILP hman phuttu, civil society organisation hrang hrang chuan kum 2015-a ILP campaign an neih ṭuma thah, Sapam Robinhood thih cham vawi lina an hmang a, Imphal East district-a Awa Ching-a a thlanah mi tam takin zahna an hlan a ni. 

JCILPS convener Yumnamcha Dilipkumar chuan ILPS hman phuta campaign chhunzawm leh thuai an tum thu a sawi a, ILPS hi hman theih a nih chiah loh pawhin ram leilung fate humhalhna turin hetiang lam hawi dan siam an phut tih a sawi. Campaign an neih leh tur hi civil society origanisation hrang hrangin an thlawp leh nghal dawn tih a sawi bawk. 

Dilipkumar chuan Rashtrapati Bhavana-a tihkhawtlai mek, Manipur Peoples' Bill, 2018 pawh pawmpui thuai tura President nawr an tum thu a sawi. He bill hi kum 2018 khan Manipur Assembly chuan a pass tawh a, mahse tun thlengin President remtihpuina an la nei lo. Hei vang hian President nawr turin Delhi-ah kal thuai an tum tih a sawi. 

Committee co-convener Jeetendra Ningombam chuan hmarchhak biala chengten ramdang mi pung zel tur dang a, leilung fate himna tur an buaipui mek laiin sorkar laipuiin Citizenship Amendment Bill (CAB) pass a tum reng tih sawiin; CAB dodal tur hian hmarchhak mipuite ṭanrual a ngaih thu a sawi bawk.



Share this Post

Login to comment
No Comments