AP Dy. CM-in state budget pharh

Arunachal Pradesh deputy chief minister leh finance minis­try changtu ni bawk, Chowna Mein chuan Thawhṭanni khan Assembly session-ah kum 2019-20 state budget a pharh. Hei hi chief minister Pema Khandu kaihhruai BJP sorkar hnuaia budget pharh hmasak ber a ni. 

Deputy CM chuan kum 2019-20 state budget atana ruahman chu cheng vaibelchhe 22,393.45 a nih thu sawiin, sum indaih lohna tur hi cheng vbc. 520.98 a nih thu a sawi bawk. Central tax aṭanga state share chu Union budget-in a sawi angin cheng vbc. 11,571 a ni dawn a, state-in ama puala chhiah a lakluh tur chu cheng vbc. 1,440 a ni ang. 

Chowna Mein chuan an state chu India rama state hmasawn leh hlim bera siam an tum tih sawiin; kumin budget-a ngaihven hlawh tak tur chu Sustainable Development Goals (SDGs) scheme an kalpui tur chu a nih thu a sawi. State sorkar chuan prime minister Narendra Modi-a'n kum 2022-a loneitute sum lakluh a leta tihpun tuma hmathlir a lo neih chu tihhlawhtlin ngei tumin a bei dawn tih a sawi bawk. 

CM flagship scheme, Sha­shakt Kisan Yojna chu zau zawka kalpui a nih dawn thu sawiin, Finance Minister chuan he scheme atan hian cheng vbc. 95.70 dah a nih thu a sawi. Health sector lamah pawh Arogya Arunchal Yogana chhunzawm zelna atan te, district panga-a hospital tihchangtlunna atan te cheng vbc. 25 dah a ni tih a sawi. 

Budget-ah hian state khaw­pui, Itanagar-a khum 200 awmna hospital sak rawt a ni a, hemi atan hian cheng vbc. 10 dah rawt a ni. Hei bakah hian TRIHMS, Naharlagun-ah hmanraw pawi­mawh leina turin cheng vbc. 50 dah rawt a ni bawk. 

Sorkar school hrang hrangte tihchangtlunna atan cheng vbc. 30 dah a ni a, secondary leh  higher secondary school tinah solar roof top panel, 3 KW dah 

ṭheuh a ni bawk ang. 

PMGSY road siamṭhat leh enkawlna atan cheng vbc. 30 dah niin, plastic waste hmanga kawng siamna atan cheng vbc 1.40 dah a ni. 

Transport sector-ah bus thar leina turin cheng vbc. 10 dah a ni a, Hollongi Airport infrastructure atan cheng vbc. 30 dah a ni bawk. Budget-ah hian TLC biala security thuam chakna turin cheng vbc. 8.5 dah a ni. 'Arunachal Pradesh Pension Scheme for Journalists' tan cheng vbc. khat dah niin, Arunachal Pradesh Club infrastructure tihchangtlunna turin cheng vbc. 3.25 dah a ni bawk.



Share this Post

Login to comment
No Comments