Chit fund thubuai chhui zo vat turin sorkar laipui phut

BJP-IPFT kaihhruai Tripura sorkar chuan chit fund organisation-a dan loa pawisa tam tak khawih chingpen thubuai 74 zet awm chu chingfel thuai turin sorkar laipui a ngen.

Nikum March thlaa sorkarna an siam hnu lawk khan BJP hian state sorkarin a din, Special Investigation Team (SIT)-te'n an chhui mek chit fund case zawng zawng chu Central Bureau of Investigation (CBI) kutah an hlan vek a ni.

Union Ministry of Personnel hnena kar hmasaa lehkha an thawnah Tripura Home Department chuan case 74-te chhui hna chu a rang thei ang bera kalpui turin an ngen a ni. BJP thupuangtu Ashok Sinha chuan sorkar hmasa Left Front sorkar kha chit fund organisation pawisa khawih chingpennaah hian an inrawlh tih a sawi a, non-banking finance company (NBFC) leh chit fund scam case-te chu CBI chhui tir duh loah a puh. 

BJP thupuangtu tho Nabendu Bhattacharjee chuan BJP sorkar hmathlir chu eirukna leh ruihhlo awm lohna hmuna Tripura siam a ni tih a sawi ve bawk.

Hetihlai hian eptu party CPI-M chuan BJP puhna hi an pha thung a, Left Front convenor Bijan Dhar chuan sorkar laipuiin dik lo takin CBI a hmang tih chu mi zawng zawng hriat a ni, tiin a sawi ve thung. Chit fund scam-ah chuan CPI-M emaw Left Front hruaitu emaw inrawlh an awm lo tih a sawi bawk. 



Share this Post

Login to comment
No Comments