Meghalaya cabinet-in Tura-ah meeting hlawhtling tak nei

Meghalaya cabinet chuan a ṭumkhatna atan Thawhṭanni khan state khawpui ni loah cabinet meeting an nei.

Meeting hi Garo Hills-a Tura-ah an nei a, chief minister Conrad K Sangma chuan meeting hlawhtling tak an nei tih a sawi. Meghalaya Democratic Alliance (MDA) chu state mipuite tana thawk tura inpe an ni tih sawiin, state chhung hmun tinah hmasawnna thlen an tum tih a twitter-ah a sawi bawk. 

Cabinet meeting-a an thutlukna siam tlangpui te :

- Meghalaya Right of Children to Free and Compulsory Education Rules 2011 siamṭhat : Sorkar laipui dana Right to Education milin, Cabinet chuan Meghalaya Right of Children to Free and Compulsory Education 2011 siamṭha turin thutlukna a siam.

-  Meghalaya Community Participation and Public Services Social Audit Services Rules 2011 cabinet hnena pawmpui dilna : Department of C & RD chuan Original Act-a draft rules an siamte cabinet pawmpuina an dil a, cabinet chuan draft rules hi a pawmsak a ni.

- Cabinet chuan Programme Implementation Department kaltlanga district tina department awmte mumal zawka enfiah a remti. District tinah kum khat atan minister pakhat ṭheuh neih an remti bawk a, hei hi departmental review meeting district thuneitute nena awmze nei zawka kalpuina tura tih a ni.

- Urban Affairs department hnen aṭanga solid waste management chungchanga rawtna - Solid Waste Manage­ment policy: Cabinet chuan Urban Affairs department rawtna chu an pawm a, a rang thei ang bera kalpui nghal turin an ti bawk.

- Commerce & Industry department aṭanga rawtna awm - Meghalaya Start up Policy 2018: Hei pawh hi cabinet chuan a pawm bawk a ni.

- Meghalaya State Sports Policy 2018: Sports department chuan hemi chungchangah hian draft policy cabinet hnen­ah hian an thehlut a, chu chu cabinet hian a pawmpui bawk.



Share this Post

Login to comment
No Comments