Shillong-ah NPP-NE coordination Conference hmasa ber nei

Tun hnaia National Party-a puan National People’s Party (NPP) chuan Pathianni khan Northeast Coordination (NECC) Committee meeting hmasa ber chu Meghalaya khawpui Shillong-ah an nei.

NPP-NE coordination con­ference hi hmarchhaka an party tihchak lehzual nan leh an hmathlir leh an ngaihdan sawihona hun atan an hmang. 

NPP-NECC hi Meghalaya chief minister hlui leh politician hlun tak Dr. D D Lapang chuan a kaihruai a, meeting an neih chu an hmathlir leh an thil tumte tih hlawhtlinna tur 'road map' siamna tur a ni tih a sawi. Election Commission of India-in an party 'National Party'-a a pawm chuan regional politics-ah kawng zau takin a hawnsak tih a sawi a, NPP chu hmarchhaka 'National Party' hmasa ber a nih thu a sawi bawk.

Lapang chuan NPP chu natio­nal level-a hmarchhak duhdante aupui tur an ni tih sawiin, hmar­chhak tana an hmabak neihte tihlawh­tling tura inpe an nih thu a sawi.

Conference-ah hian - Assam, Arunachal Pradesh, Nagaland, Manipur, Meghalaya leh Mizo­ram aṭangin tel an ṭha hle a, Meghalaya chief minister Conrad K. Sangma, Manipur deputy chief minister Joykumar Singh, Manipur-a NPP cabinet minister-te leh MLA-te pawh an tel a ni.

Conference-ah hian an party MP neih chhun Agatha K Sangma, Arunachal-a CLP Leader  Mutchu Mithi leh Meghalaya-a Selsella by-election a chak ta CA Sangma-te lawmna hun NPP chief Conrad K Sangma chuan a hmang. Arunachal-a NPP MLA hel kuta thi Tirong Aboh sunna hun an hmang bawk.

Conrad K. Sangma chuan National party-a NPP puanna chu hmarchhak tana hlawhtlinna a nih thu a sawi a, an hruaitu thi ta Purno Sangma hriatreng a nih thu leh amah awm tawh lo mah se a suangtuahnate chu a awm reng tawh dawn tih a sawi a ni.

National party an nih theihna chhan chu NPP-in Meghalaya-a sorkarna an siam vang emaw, state ṭhenkhata MLA an neih vang emaw pawh ni loin, inthlana chak MLA zawng zawngte leh chak zo ve lote zawng zawng thawhrah a nih thu a sawi.

"NPP chu hmarchhak peng pakhat mai ni loin, hmarchhakin an duhdante an tih hlawhtlin theihna atana an din," tiin NPP din chhan a sawi bawk a ni. 



Share this Post

Login to comment
No Comments