Assam in Congress an vote ang: Harish Rawat

Assam Congress-in-charge Harish Rawat chuan Inrinni khan Assam mipuite chuan Congress an vote dawn tih sawiin, saffron party in Citizenship (Amendment) Bill putluh leh an tum avangin Lok Sabha inthlan kal mekah Asasm mipuite chuan Congress an vote dawn a ni, a ti.

All India Congress Committee (AICC) general secretary chuan April 11-a constituency pangaa inthlan an neih zawh takah Congress chu an che ṭha hle tih a sawi. 

Congress chuan seat pangaah hian hnehna an chang ngei dawn tih sawiin ground report an dawn danin anti-constitutional bill putluh leh an tum avangin Assam mipuite chuan BJP chu hrem an tum tih an sawi. Press conference-a thu a sawinaah Rawat chuan April 18 leh April 23-a inthlan an hmachhawn leh turah pawh hnehna an chan leh ngei a ring tih a sawi bawk.

An president Rahul Gandhi chuan thuneihna an chang a nih chuan bill chu an paih bo dawn tih sawiin, an manifesto-ah pawh chiang taka an telh thu a sawi.

Mipuiin bill an dodal mek laiin BJP in hnehna an chan chhan tur a hre lo tih a sawi a ni. Rawat chuan Congress chuan seat 14 awmah seat 10 tal chu an la dawn tih a sawi bawk.



Share this Post

Login to comment
No Comments