Tripura hi BJP in experiment tihna atan an hmang: Left party

CPI-ML (Liberation) member Rajaram Singh chuan BJP sorkar chu beiin, BJP chuan Tripura chu Laboratory anga an hman thu leh eptu pawl te beihna tur enchhinna hmun atan an hmang tih a sawi.

Media mite hmaa thu a sawinaah Singh chuan Tripura Assembly inthlan hnuah Tripura-ah chuan dan leh thupek nasa taka palzut a nih thu a sawi a, state chhungah hlauhna rau a leng nasa a ni, a ti.

Pawikhawihna tamna hmun nia sawi ṭhin hmunte chu Left party aiawh te bakah  activist Medha Patkar leh All India Kishan Sabha joint secretary MP K.K. Ragesh-te chuan kar liamta kartawp lam khan ni thum chhungin an tlawhkual a ni. Hemi tlawhkualna an neih zawh hian Singh chuan BJP sorkar hi a bei zui nghal a ni.

Activist Medha Patkar pawhin BJP leh Rashtriya Swayamsevak Sangh (RSS) worker-te chuan politics hmingin Tripura mipuite khawsak phung nasa takin an tibuai tih a sawi . Tualthahna te pawh a thleng nasa hle niin a sawi bawk.

Patkar-i chuan Tripura chungchang chu Parliament-ah pawh sawichhuah hial chi a nih thu a sawi a, Election Commission of India pawh hriattir an ngaih thu a sawi.

Singh chuan BJP-IPFT worker-te chuan mipuite an tihretheih dan chu a nasa hle tih a sawi a, hmeichhia te chungah pawh hleilenna an thlen nasa tih a sawi bawk a ni.



Share this Post

Login to comment
No Comments