Nagaland tuikhuah sahin Assam thingtlang khaw 116 nghawng

Nagaland Wokha district-a tuikhuah sah chuan Assam Golaghat district-a thingtlang khaw 116 lai mai a nghawng a, tui a len phah nasa hle niin an tarlang.

Tuikhuah(dam) an sah hi  North East Electric Power Corporation Limited (NEEPCO) enkawl a ni.

Kar hmasa aṭang khan Assam hian tuilian a tawrh vawi hnihna a ni leh tawh a, kar hmasa tuilian khan Golaghat, Sivsagar, Dhemaji, Lakhimpur leh Darrang district te chu a nghawng tawh a, mi 1,04,205 in harsatna an tawk a ni. Tunkara Golaghat district-a tuilian hian mi 93,000 vel a nghawng niin an sawi.

Assam State Disaster Management Authority (ASDMA) official-te chuan tuilian hian thlai chinna hmun ram hectare 7,424 vel a nghawng tih an sawi a, mi 26,000 vel chuan hmun him lam panin  relief camp 123-ah an awm mek tih an sawi bawk.

Pawl hrang hrang All Assam Students’ Union (AASU), Krishak Mukti Sangram Samiti (KMSS) leh Asom Jatiyatabadi Yuva Chatra Parishad (AJYCP) te chuan NEEPCO chu tuikhuah an sah avangin an dem hle a, tuikhuahin a nghawng thingtlang khaw mite hrilh hmasa loa tuikhuah an sah chu an dem thu an sawi a ni.

Heng pawl hrang hrang hian tuilianin a nghawng mipuite hnenah hian zangnadawmna pe turin an phut a ni.

KMSS leader Akhil Gogoi chuan NEEPCO chuan tuikhuah an sah a ni mai lo a, sediment pawh an paihchhuak tel tih a sawi a, heng hian thlai chinna hmun tam tak a tihchhiat bakah khaw 116 lai nasa takin a nghawng  tih a sawi. Sediment hian thlai chinna hmun a nghawng nasat avangin lonei mite tan harsatna nasa tak a thlen a ni, a ti.

Hetihlai hian NEEPCO chuan Thawhṭanni khan thuchhuah siamin upper catchment area-ah ruahtui a nasat avangin tuikhuahah chuan tui a tam phah hle tih an sawi a, July 25 aṭang khan nasa taka tuiin a chim chin a san belh tih an sawi.

Tuiiin a chim chin a san zel avangin tuikhuah chu sah a ngaih phah ta tih an sawi bawk.

NEEPCO thuneitute chuan Golaghat district thuneitute an hriattir thu an sawi ve thung.

Assam-ah hian June thla aṭang khan vawi 12 lai mai tui a lian tawh a, mi nuai 10 chuangin nasa takin an tuar a ni. ASDMA chuan tuilian vangin mi 42 in nunna an chan tawh tih an sawi.



Share this Post

Login to comment
No Comments