Tripura-a BSF silai hmehpuahah civil mi pathum an thi

Border Security Force (BSF) patrol-te chuan, Tripura-a India-Bangladesh border-ah kar kalta Zirtawpni khan civil mi pathum an kap hlum a, boruak a sosang hle. 

BSF official chuan, BSF-te'n an tih ṭhin angin ramri paltlanga Bangladesh aṭanga dan loa bawng tawlh luh veng turin an kal a, ramri depa awm Chittabari khuaa civil mite chuan duty te hi lo beiin, tawpsan tura an ngen hnuah pawh an beih chhunzawm zel avangin, BSF-te chuan silai an hmet puak ta mai niin a tarlang. Chittabari-a inbeihna thlengah hian civil mi pathum kah hlum an nih bakah, BSP mi leh sa pahnihin hliam an tuar a ni. Civil mi thi te hi Man Kumar Tripura (30), Par Kumar Tripura (40) leh Saralaxmi Tripura (33)-te an ni a, hliam tuarte chu sorkar hospital-ah dahluh an ni. 

Chittabari khaw mi leh sa te chuan BSF-te hian hmeichhe tleirawl pakhat chu khawihbuai an tum niin an sawi a, hemi hnu hian buaina a chhuak zui ta niin an sawi. He thil thleng duh lohna lantir hian Tripura-a rorel lai Communist Party of India - Marxist (CPI-M) chuan Inrinni khan, Sabroom sub-division  huamchhungah darkar 12 awh lungawi lohna an lantir. Lungawi lohna lantir a nih avang hian nunphung a khaihlak phah a, sumdawnna hmun khar a nih bakah, lirthei chevel hmuh tur a awm lo a ni. 

Director general Police K Nagaraj chuan, venhimna khauh taka kalpui a nih thu sawiin, thil duhawm lo thleng a awm hriat a nih loh thu a sawi. Chief minister Manik Sarkar chuan he thil thleng hi a dem thu sawiin, chhui chiang turin chief secretary Sanjeev Ranjan leh state police hotute a hriattir nghal a ni. He thil thlenna hmun hi Tourism minister Ratan Bhowmik leh rural development and forest minister Naresh Jamatia-te pawhin tlawhin, thil awmdan an enfiah a ni.


Share this Post

Login to comment
No Comments