Manipur : MHA-in inbiakna neihpui turin UNC-te sawm

Ministry of Home Affairs (MHA) chuan Manipur-a National Highaway (NH) dan chah mek tihtawp a nih theih nan United Naga Council (UNC)-te chu inbiakna neihpuiah a sawm. 

UNC-te hian MHA aṭanga inbiakna nei tura sawmna hi kar kala Inrinni khan ziakin an dawng a, nimin chawhnu khan Senapati district-a DC office-ah inbiakna hi neih tura ruahman a ni. He hunah hian Ministry of Home Affairs, UNC leh Manipur sorkar aiawh Additional Chief Secretary Dr Suresh Babu leh Commissioner (Works) K Radhakumar-te an tel rin a ni. A hma pawhin inbiakna hi neih a lo ni tawh a, thutlukna erawh siam fel a ni lo. Manipur tualchhung chanchinbu ṭhenkhat chuan vawiin aṭang hian UNC-te hian NH dan chah an tawpsan dawn niin an tarlang a, thuchiang erawh hriat a la ni lo. 

NH hi 137 chhung zet dan chah a ni tawh a, Manipur chanchina kawngpui dan chah rei ber a ni. Sadar Hills District Demand Committee chuan kum 2011 khan ni 123 chhung zet kawngpui an lo dang chat tawh bawk. UNC-te hian Congress kaihhruai sorkarin kum 2016-a district thar a din danah lungawi loin, nikum October aṭang khan NH hi tiam chin awm loin an dang chat a ni. Chief Minister thar N Biren chuan UNC-te hi kawngpui dan titawp turin a lo ngen tawh a, inbiakna neihpuiah a sawm a ni. Pawl hrang hrang pawhin inrema siam thuai turin an nawr a, NH dan chah chu tihtawp thuai an duh thu an sawi a ni. 

Kar kalta Zirtawpni khan state cabinet meeting chuan UNC-te'n tiamchin awm loa NH an dan chah chungchang hi an ngaihtuah a, titawp tura chak zawka hma lak an rel a ni. Meeting-ah hian Deputy CM Yumnam Joykumar bakah,  Minister thar L Jayentakumar, Karam Shyam, Letpao Haokip, N Kayisii, Th Shyamkumar, L Dikho, besides Chief Secretary O Nabakishore, DGP LM Khaute leh Secretary to CM N Ashok Kumar-te pawh an tel. Hetih lai hian UNC president Gaidon Kamei chuan UNC-te thutlukna leh an kal zel dan tur chu police custody-a a awm chhung chuan puna chhuah a duh loh thu a sawi. Gaidon bakah hian publicity secretary Shangkhel Stephen-te chu NH dan chah a nih chhanah mawhphurtua puh an ni a, nikum November thla khan man an ni a, Imphal East Chief Judicial Magistrate chuan March 31 thleng custody-ah awm turin a ti a ni. 

UNC-te hian Manipur chakkhai lamna kawngpui pawimawh NH-2 leh NH-37-te an dang chat a, hei hian nghawng a nei lian hle.


Share this Post

Login to comment
No Comments