Kohima Job Fair 2026-ah hna zawng inziak lut 70,000 chuang an awm: Nagaland Governor

Nagaland governor Nand Kishore Yadav chuan Inrinni khan kumin February thla thleng state-ah hna la nei lo hna zawng mek inziak lut mi 70,469 an awm tih a sawi. State khawpui Kohima-a Don Bosco College-a Kohima Job Fair hawnnaa thu a sawiah, Yadav chuan state-a hnathawh tur awm mekte tarlangin, hnathawh tur leh eizawnna ngelnghet siam turin sorkar department, zirna in, industry leh social organisation-te thawh hona tihchak a ṭul thu a sawi.

Job fair-ah hian sector hrang hranga company 25 chuang leh hna zawng mi 500 aia tam an tel a ni. Yadav chuan hnathawh nei lote harsatna sutkian kawngah leh, state-a ṭhalaite tana hun remchang siamsak kawngah thawh hona ṭha tak neih a pawimawh thu leh, Union Ministry of Labour and Employment hnuaia placement network, National Career Service portal-a India rama NGO inziak lut hmasa ber, Don Bosco Job Placement Network chu a fak bawk.

Kum sarih liam ta chhungin he network hian ram puma ṭhalai 40,000 chuang tan eizawnna lama inkaihhruaina, thiamna tihhmasawn, leh job placement service hmangin hnathawh tur a lo siamsak tawh a ni. He huna company telte chungah lawmthu sawiin, Governor chuan state ṭhalaite theihna lantir a, state bakah ram leh economy ṭhanlenna atan a pawimawh hle tih a sawi. Job fair hlawhtling taka kalpui a nih avangin a buatsaihtu, an thawhpui, employer, leh volunteer-te chungah lawmthu a sawi bawk.