Nagaland: Lo neih tih hmasawnna atan digital infrastructure hmang dawn

Nagaland Agriculture Department chuan lo neih kalphung thlak danglamna turin July 2 khan digital infrastructure thar an tlangzarh.

Directorate of Agriculture-a hawnna inkhawmah hian Agriculture Department advisor Mhathung Yanthan chuan department buatsaih digital platform chu ṭha a tih thu leh lawmawm a tih thu a sawi. He digital platform hi technology lama hmasawnna ropui tak a nih thu a sawi a, Geographic Information System (GIS), Remote Sensing (RS), specialized GIS software, mobile application, leh server system pawimawh tak a ni tiin, digital lama hmalakna chuan lo neih kawngah nasa takin a pui dawn a, loneitute sum lakluh a tihpun dawn bakah nitin khawsakna thlengin hma a sawn tir dawn a ni, a ti.

Yanthan chuan thingtlang lama digital infrastructure ngaih pawimawh a ṭul zia tarlangin, huamzau zawka a bulṭhut aṭanga hman leh field staff te digital hmanrua nen thuam a, data lakkhawm, endik leh loneitute tana a hun taka service thar an pek theihna turin a pawimawh tih a tarlang bawk. Digital platform hian ruahmanna felfai leh sorkar scheme ṭangkai zawka hman theihna kawngah a pui dawn a, Nagaland loneituten hamṭhatna nasa tak an dawng dawn a ni, a ti.