Hri vangin Nagaland CM residential complex khar CM khung hrang nghal

Nagaland Chief Minister residential complex-a thawk zingah Covid-19 kai hmuh chhuah an awm avangin Ningani aṭang khan darkar 48 chhung atan khar nghal a ni a, chief minister Neiphiu Rio hi a test result negative mah se fimkhur thilah a inkhung hrang nghal bawk. 

CM chenna ina thawk ṭhenkhatin hri an kai tih hmuh chhuah a nih hnu hian in pawh hi damdawi hmangin kah thianghlim nghal a ni. Hri kaiin contact a lo neih tawhte chhui mek a ni. 

Ningani khan Nagaland-ah hri kai hmuh chhuah thar hi mi 53 an awm a, an zinga 32 chu Dimapur mi niin, Kohima-ah mi 16 leh Mokokchung-ah mi panga an awm bawk. Hemi ni vek hian hri kai enkawl zinga mi 30 chu an dam bawk. 

Nagaland-a hian hri kai hmuh chhuah tawh mi 1,566 awmin enkawl mek hi mi 936 an awm a, hri kai dam tawh mi 625 awmin, mi panga in he hripui  hi an thihpui tawh a ni. 

Ni khat awh Assembly session, Ningania neih tum chu hri kai hmuh thar zingah Assembly Secretariat staff paruk, MLA pakhat leh session-a tel ngai thawktu ṭhenkhatte an tel avangin August 13-a neih tura sawn a ni. Assembly Secretariat pawh darkar 48 chhung atan khar a ni tawh bawk. 

State sorkar chuan hri kai an la pun belh zel avangin lockdown kalpui mek chu August 31 thleng hman chhunzawm a rel. June 11 khan High-Powered Committee (HPC) chuan July 31 thleng atan lockdown hi a lo pawtsei tawh a, Ningani khan sorkar chuan August thla chhunga tana pawhsei a rel leh a ni.  Hri kai tam zualna district pathum - Kohima, Dimapur leh Mon-ah chuan total lockdown puan a ni a, district dangah erawh chuan khuahkhirhna hi thlahdul ṭhen a ni thung. 



Share this Post

Login to comment
No Comments