AIUDF MLA-ten CAA duh lohna lantir

 All India United Democratic Front (AIUDF) MLA-te chu nimin khan Assam Legislative Assembly kawtah Citizenship (Amendment) Act duh lohna lantirin puan duma an hmai tuamin nawrh an huaihawt. 

AIUDF MLA-te chuan he dan sawisel hlawh tak hi ṭhiat leh nghal turin an phut tih an sawi. 

Assam Assembly chuan CAA chungchang sawihoin nimin khan special session a nei a, mahse AIUDF MLA-te hian an lungawi lohna lantira House chhunga an au avangin minute 45 chhung inkhawm tihtawp lailawk a ngaih phah a ni. 

AIUDF chuan Assam chief minister Sarbananda Sonowal chu Assam mipuite phatsantuah puhin bang turin an phut bawk. Party MLA Aminul Islam chuan CAA chungchawi sawihoa special session, ni hnih chhung nei turin an ngen a, mahse ni khat chauh siam a ni tih a sawi.Hei hian sorkarin CAA chungchang sawiho tak tak a duh lohzia a tilang chiang hle a ni, a ti. 



Share this Post

Login to comment
No Comments