Jan 19-ah Amit Shah leh NE hruaitute'n CAA sawiho dawn

Union home minister Amit Shah chuan January 19 hian hmarchhaka tualṭo party hrang hrang, NGO leh stakeholder-te hmuin, Citizenship (Amend­ment) Act chungchang an sawiho dawn tih Tripura minister Mevar Kumar Jamatia chuan a sawi. 

IPFT general secretary leh state tribal welfare minister Jamatia chuan CAA duh lohin ramchhung hmun hrang hrang, a bikin hmarchhak bialah nawrh huaihawt a ni reng tih sawiin, NDA thawhpui party te pawhin he dan hi an dodal a, Tripura pawh a bang bik lo a, IFPT pawhin he dan hi an duh lo a ni, a ti. 

Jamatia chuan kum 2016 aṭang khan CAB hi na takin an dodal a,mahse vanduaithlak takin Parliament-ah pass a ni zui ta tho a ni, a ti. He dan hi India ram mipuite tan a him lo a, tribal chauh ni lo non-tribal thlengin a nghawng vek dawn a, a bikin an state-ah chuan a nghawng a pawi thei dawn hle niin a sawi. 

Tribal minister chuan, "Tripura-ah hian international border zau tak a awm a, hei vang hian ram pawn lam aṭang­in rawn lut pawh an awm reng a ni. Heng mite India khua leh tui nihna pek an ni fo tawh bawk a, hei vang hian BJP sorkar chu thawhpui mah ila, he dan siam chungchangah chuan kan lungrualpui thei lo a ni," a ti. 

CAA hman ṭan a nih tawh avangin he dan hnuaiah hian ramdang mi lutte chu khua leh tui nihna pek an nih dawn avangin an state mipuite pawh nasa takin an pung chho ang a, a ram leilung fate chu a tlem zawk an ni thuai dawn niin Jamatia chuan a sawi. 



Share this Post

Login to comment
No Comments