NESO-in hmarchhakah ILP leh NRC kalpui phût

North East Students’ Organi­sation (NESO) chuan Citizenship (Amendment) Bill, 2019 an dodal­na kal zelah union home minister Amit Shah hnenah hmarchhak state hrang hranga ram leilung fate humhim an nihna tur thil pali an phûtte chu an thlen.

NESO hian Union Home Minister chu Citizenship Act siamṭhat tum kaltlang pui lo turin an ngen a, hmarchhak state hrang hrang ram leilung fate duhdan zah sak turin an phût thu an tlen a ni.

Hmarchhak state zawng zawngah Inner Line Permit (ILP) kalpui phûtin Indo-Nepal Treaty of Friendship, 1950 chuan hmarchhak huam lo se an duh thu an thlen. Hmarchhak state zawng zawngah National Register of Citizens (NRC) kalpui vek phût­in, hei hi state dinhmun ṭheuh thlirin 'base year' hrang ṭheuh siam an duh thu an thlen bawk.

NESO hotupa Samuel Jyrwa chuan Inrinnia Citizenship (Amendment) Bill, 2019 chung­changah Amit Shah-in meeting a kohah heng an duhnate hi an thlen tih a sawi.

"CAB kan duh lohnate thlenin, hmarchhaka cheng ram leilung fate tana ṭha lo a nih thute pawh kan thlen. Sorkar chuan hmarchhak ram leilung fate chu kawng hrang hrang- ṭawng, hnam leh sakhuaah pawh a tlem zawk vek kan ni tih an hrethiam tur a ni," a ti.

Samuel Jyrwa chuan CAB hian Assam Accord, 1985 pawh a palzut tih sawi bawkin, "Bill hian state chhunga dan loa luh hukna bak a thlen dawn lo a, ram leilung fate chu anmahni ram ngeiah tlem zawk an ni mai dawn a ni," tiin a sawi bawk. 



Share this Post

Login to comment
No Comments