Tripura aṭangin Bru raltlante nawrchhuah luih theih an ni lo : Pradyot

Tripura Cong­ress president hlui, Pradyot Deb Barma chuan Tripura-a Bru ral­tlante awm mekte dikna chanvo humhalh sak turin a bei dawn tih sawiin, tumahin an state aṭangin Bru-te hi an tihluihna hmangin an nawrchhuak ngawt thei lo, a ti. 

Deb Barma hian Nilaini khan Kanchanpur Bru campa tlawh a, sorkar laipuiin refugee camp-a awmte hnena a thlawna ration a pek ṭhin a tihtawp avanga nawrh huaihawt mek, raltlan awmte chu a kawm a ni. 

Congress hruaitu hlui chuan, "Citizenship (Amendment) Bill (CAB) hnuaiah Tripura-a Bangladesh mite awm phalsak an nih theih chuan, eng vangin Bru-te chu pawm an nih loh bik ang?"  a ti. Tripura chuan Bru te awmna tur ram a la ngah tawk a, an ram a ni a, tumahin an nawr lui thei lo tiin a sawi. State sorkarin BSF firing range atana ram acre 2,700 pek tur a ngaituah theih laiin, a ram leilung fa ngeite awmna tur ram a pek theih loh chhan a zawt nghal bawk. 



Share this Post

Login to comment
No Comments