Tripura eptu hruaituin CIC atana Rao ruat a duh lo

Tripura eptu hruaitu leh chief minister hlui, Manik Sarkar chuan state sorkarin Chief Infor­mation Commissioner (CIC) atana state election commi­ssioner (SEC) hlui GK Rao ruat a tum chu duh loin, Tripura mipuite lakah thil dik lo tihna nia a ngaih thu a sawi. 

Agartala-a chanchinbu mite a kawmnaah, Sarkar chuan GK Rao hian SEC a nih laiin a duty pawh a hlen zo lo a, a hun lai hian vote pawh thlak thei lo leh, an duhzawng candidate pawh vote thei loin mi tam tak an awm a ni, a ti. 

"Mi tam tak chu Rao lakah hian an lungawi lo a, hetiang dinhmun a nih lai renga  sorkarin CIC atana a ruat hi thil dik lo tak a ni," tiin a sawi. 

State sorkar chuan GK Rao ruatna hi tichhuak tawhin, a hna thar hi naktuk aṭangin a zawm dawn a ni. 

Sarkar chuan August 19 khan chief minister, cabinet minister, opposition leader leh chief secretary-te chuan chief minister chenna inah meeting an nei a, CIC post diltu mi 12-te dilna chu enfiahin, hetah pawh hian member dangte bulah Rao chu a thlawp loh thu a sawi tawh tih a sawi. 

GK Rao SEC a nih lai hian panchayat inthlanah pawh tharum thawhna nasa tak chhuakin, vote tihchingpen thawm pawh state chhung hmun hrang hrangah a awm ṭhin tih Sarkar chuan a sawi. 

Hetihlai hian Rao hian thil thlengte chu a ngawihsan mai mai a, hei vang hian mipuite chuan inthlanah an democratic rights pawh an hmang thei lo a ni, a ti. 



Share this Post

Login to comment
No Comments