Conrad leh Rio-ten CAB chungchang sawichhuak

Meghalaya leh Naga­land chief minister-te chuan Guwahati-a North East Democratic Alliance (NEDA) 4th conclave neih­ah, Citizenship Amendment Bill (CAB) chungchang an sawichhuak. Hemi chungchang hi state dang hruaitute pawhin an sawi zui ve bawk. 

Nagaland chief  minis­ter leh Nationalist Demo­cratic Progressive Party (NDPP) president Neiphiu Rio chuan centre-a BJP kaihhruai National Demo­cratic Alliance (NDA) sor­karin CAB hi pass a nih chuan, hmarchhak mipuite dinhmun pawh a danglam phah hle dawn tih a sawi. Hmarchhaka regional party-te chuan CAB hi an dodal a, an la dodal chhunzawm zel tih sawiin, resolution pawh an siam a ni, a ti. 

Meghalaya chief mi­nister leh National People's Party (NPP) president Conrad Sangma pawhin hmar­chhak state hrang hranga mipuiten CAB chung­chang an ngaihdante a sawichhuak. CAB hi pass a nih chuan, Bangladesh aṭangin India ramah an rawn lut ruih ruih mai dawn a ni, tiin a sawi. 

Conrad Sangma chuan CAB chungchang hi sawiho a, fimkhur taka enṭhat a ngai tih sawiin, "Cut-off date a awm dawn em? Citizenship chungchanga thutlukna hi state sorkarin nge sorkar laipuiin siam dawn? ILP leh Sixth Schedule kaihhnawih dante hi CAB hman a nihin a la hman chhunzawm theih zel dawn em? Heng thilte hian kan rilru a tibuai a ni. Chiang taka sawifiah hma­sak a ngai a ni," tiin zawhna hrang hrang a zawt nghal. 

Sangma chuan centre-a NDA-in sorkarna a chan hnuah hmarchhak bialah a ṭha lama inthlak danglamna nasa tak a thlen tawh thu a sawi. "Central hruaitu leh minister-ten hmarchhak state leh an khawpui hming an hriat loh laite kha a awm ṭhin. Hmarchhak mipuite hi rilru na hma tak kan ni a, ngaihsak kan ngai a ni. Tunah chuan an beisei anga ngaihsak leh zahna pawh an hmu tawh a, a danglamna hi a taka hmuh theihin a awm a ni," a ti. 

NEDA conclave hi union home minister Amit Shah leh DoNER minister Dr Jitendra Singh-ten an hmanpui a ni.



Share this Post

Login to comment
No Comments