Darthawma Road

Kar hmasa khan INA sipai Darthawman Tamrapatra award a dawn thu vel kan sawi kha a ni a, tun ṭumah chuan Darthawma Road kan sawi ang.

Airport hrang hranga Darthawma chawimawina thuziak intar te hi a hmuhnawm hlawm hle mai a, a milem thlalakte chu kan tarlang seng lo ang a. Silchar, Dimapur, Agartala, Guwahati, Kolkata, Chennai, Raipur, Bhubhaneswar leh hmun dangah pawh an tar hlawm a ni. AIR August ni 23, 2021-in a puan dan chuan INA-a Mizo sipai lo ṭang tawhte chu Biakliana Thakthing Veng Aizawl, Kapthanga Ruallung, Thangṭhiauva Bethlehem Vengthlang, Vanhlira Mission Vengthlang leh Darthawma Lunglei te an ni a. Singapore-a tluk hnua INA-a inpe ve zawk Rosiama chanchin erawh an sawi lo. Mizo zingah INA-a ṭang zinga a hmingthang zui ta ber Darthawma hi a vannei a, a dam rei man a tel ti pawh ni ila, a sual awm lo ve.

Tun ṭuma kan sawi tum ber chu Darthawma chawimawi nana Uttar Pradesh state-a Meerut khuaa university pakhat Swami Vivekanand Subharti University (SVSU) chhunga Darthawma chawimawina an siam thu a ni. An university campus chhunga kawng pakhat chu Darthawma Road an ti tlat mai. University-a M Sc (Microbiology) zirlai Angela Laldinpuii Renthlei min hrilh dan chuan an university hian India ram zalenna sualtute hi an ngaisang em em a, chuvangin India ram zalen nana sualtu Indian National Army-a tel ve Darthawma hi an ngaihlu a, a hming chawiin an hungchhunga kawng pakhat chu Darthawma Road tiin an vuah a ni.

Swami Vivekanand Subharti University hi kum 2008-a din kha a ni a, private university a ni. The National Assessment and Accreditation Council (NAAC) chuan ‘A’ grade a pe a, national leh international award pawh a dawng nual tawh a ni awm e. He university hi UGC, MCI, DCI, IAP, INC, PCI, AICTE, BCI, NCTE te chuan an recognised tawh a, certifications a dawn zingah ISO 9001:2015, GLP, NABL, NABH, AISHE te chu a langsar zual an ni. He university-ah hian undergraduate, postgraduate, Ph.D. programmes, diploma programnes, PG diploma courses, certificate courses ang chi 220 vel zet a zir theih a ni. Outlook magazine chuan kum 2022 khan India rama university ṭha zual 50 a thlan zingah 29-na a ni a. IIRF-in a zir chian dan ve thung chuan India rama university ṭha zual 171 a thlanchhuah zingah 12-na a hauh bawk. Times of India chanchinbu pawhin B.Tech zirna ṭha 170 a thlanchhuah zingah 121-na a hauh a, UP bikah 15-na a hauh pha a ni. University naupang te ni si, zirna ṭha ber pawla a ṭang thuai thei hi a fakawm hle awm e.

Angela chuan, “Subharti university hian India ram zalenna sualtute hi a ngaisang em em a, Department sawmthum chuang a nei a, chung dept. tinte building-ah chuan freedom fighter hming an tar hlawm a. Subhash Chandra Bose-a hi an ngaisang em em a, India ram zalenna sualtu zingah an ngaihsan bik a ni”, a ti. University website-ah chuan heti hian a inziak a: ‘Swami Vivekanand Subharti University chuan real-life national heroes te hi a ngaisangin a zah em em a. An huaisenna thiltih ropui takte hian min ti phurin min khawih em em a. Netaji Subhash Chandra Bose-a phei hi chuan kan nun min hnehin kawng tam takin min khawih a ni’.

He university hian North East aṭangin freedom fighter pathum a chawimawi a, Darthawma bakah hian Manipur mi pakhat leh Meghalaya mi pakhat chawimawina thil an siam niin Angela chuan a sawi bawk. Darthawma chawimawi nana Darthawma Road an siam hi Engineering college panna kawng a ni a, a thlalaka kan hmuh ang hian kawng ngil nuam tak a ni. Darthawma Road hi kum 2016 lam tawha an lo siam kha a ni awm e, tun April 2024 hian Darthawma Road chu an siam ṭha mek a ni.

Mizo zingah hian an hming chawia kawng phuah hi an tam lo hle a. Aizawl khawpuiah leh zokhaw lamah Rokunga Road, Chawnga Road, Laldenga Road, Lalruotmawi Road tih leh a dang pawh sawi tur kan hre nual ang. Mahatma Gandhi Road kan tih ang, ram pumpui huapa mi ropui hming chawi hi chu khawpui tinah a awm a. Amaherawhchu, Mizoram pawna Mizo hminga kawng an phuah kan hriat chhun chu Darthawma Road hi a ni mai awm mang e.