Territorial Army - ṭhalai tan a lawmawm

Mizo hlang awmna sipai, Mizo Territorial Army (Home & Heart) lâk rûnpui hmasa ber chu November 15-25, 2025 chhungin Rajiv Gandhi Stadium-ah buatsaih a ni dawn ta a, a hnai ta hle; ngawrh taka inbuatsaih a ni.

Mizo Territorial Army lâk turah hian sorkar chuan Mizo ṭhalai a tam thei ang ber inlan se an duh a, inlan tura ṭhalaite sàwmna pawh an bei ngawrh viau. Mizoram hmun hrang hrangah pre-recruitment rally buatsaih a ni bawk.

Mizo Territorial Army lak tur hi ruling party lam chuan Chief Minister hmalakna vanga buatsaih tur a nih thu an sawi a; Territorial Army buaipuitu ruling MLA pakhat chuan CM-in Prime Minister leh Defence Minister te dil lo se Mizoramin a neih loh tur thu a sawi hial. Chutih laiin, eptu party lama mi ṭhenkhat chuan CM hmalakna vang ngawr ngawr a nih loh thu an sawi ve thung niin a lang.

Chief Minister-in hmalakna leh bawhzui chin a nei ngei a, chutihrualin, a hmalakna vang a ni vek lo mai thei bawk. A eng pawh chu ni se, Mizo hlang awmna tur Mizo Territorial Army din a ni dawn leh sipai tur lak a ni dawn ta hi a lawmawm a, Mizo ṭhalai tam takin hna ṭha tak an neih phah dawn a ni.

Thuneitute sawi danin, Territorial Army general duty hi kum 18-42 inkar tan dil theih a ni a, Mizoramah mipa 135 leh hmeichhia pakua lak phawt tur niin, Mizoramah chauha thawk tur an ni. General duty bik chu sipai pangngai ang tho, full time-a thawk tur niin, sorkar laipui hnuaia thawk an tlukpuite hlawh ang zel pek tur a ni a; sipai hamṭhatna zawng zawng an dawng thei dawn bawk.

Mizo Territorial Army din a ni dawn ta hi a lawmawm tak zet a, ṭhalaite tan a lawmawm lehzual. Hna ṭha tak a nih avangin Mizo ṭhalaite a tam thei ang ber inlan se, tling thei ngei turin theihtawpin han ṭang sauh sauh teh se.

Mizorama Territorial Army bul ṭan nan company pahnih din phawt tur a ni a, company din belh zel tur niin, battalion anga la awm zui tur a ni. Lâk belh zel tur thlir chungin ṭhalaite pawh an inbuatsaih zui zel a pawimawh dawn a ni.