Inthlanah rilru dik pu zel ila

Dampa biala MLA by-election chu November 11, 2025 khan tluang taka neih a ni. Inthlanah hian voter 20,888 zinga mi 17,351-in vote an thlâk a, vote tla percentage chu 83.07% a ni. Postal ballot hmanga vote tla zat erawh hriat a la ni lo.

Dampa by-election-a vote tla zat percentage hian kum 2018 leh 2023 inthlanpuia vote tla zat a pha lo deuh. Bial chhunga khaw hrang hrangah mahni khuaa awm lo, khaw dang daiha awm, vote thlâk tura haw remchang lo eng emaw zat an awm ngeiin a rinawm a; chuti chung chuan 83.07% lai a tlâk avangin vote a tla ṭha thawkhatah a ngaih theih. Mipuiin vote thlâk an ngai pawimawh tih a lang a, a lawmawm.

Tun ṭum by-election-ah hian polling station 41 a awm a, chung zingah chuan vil uluk ngai zual bikte pawh a awm. Buaina leh harsatna lian tham awm loa tluang taka vote thlak zawh a ni hi a lawmawm em em.

Mizoramah inthlan reng reng muanawm tak leh felfai taka neih a ni ṭhin. Duhthusam vek ni bik lo mah se, India ram hmun danga inthlante ngaihtuahin, a rálmuang a, zalên takin mipuiin vote an thlâk a ni. Hengte hi mi tin thawh rah a ni a tih theih.

Inthlan buaipuitu sorkar lama official te, venhimna hna thawktute an thawk rim em em a, zan rei tak tak thleng an men phah a; an inpekna a chhuanawm tak zet. Anni zarah inthlanna tluang taka neih a ni.

Dampa by-election-a candidate-te leh an awmna political party-te an thawk rim em em. Tlin duh vek an ni a, inbeihna nasa tak karah inthlanna tibuaia tirálmuang lo thei záwngin an che lo tlang niin a lang a, an fakawm. Sum sema inpuhna te, thil dik lo tia inpuhnate awm bawk mah se, India ram hmun dangte ngaihtuahin kan la ziaawm hle.

Vote thlâktu mipui an pawimawh em em. Vote neite'n khua leh tuite tih tur pawimawh tak hriaa vote an thlak avangin a lawmawm a; democracy ram kan nihna tihlawhtlingtute an ni.

Inthlanna dik, felfai leh thianghlim, zalên leh rálmuang nei tur hian mi tin kan pawimawh vek tih hre thar zel ila; kan ramah inthlan a la awm fo dawn a, chu'ngah chuan India rama inthlanna felfai leh thianghlim ber, rálmuang ber nei zel turin dikna nen rilru i siam thar zel ang u.