Khawpuia lirthei chêt vel dan ṭha

November 7-9, 2025 chhunga Gurugram, Haryana-a neih 18th Urban Mobility India-ah Mizoram chuan special award a dawng a, state sorkar aiawhin Urban Development & Poverty Alleviation (UDPA) department hotute'n an dawng.

Sorkar thuchhuakin a tarlan danin, award dawng tur hian UDPA hnuaia Town & Country Planning Wing chuan kumin October 16 khan khawpuia lirthei che vel enkawl dan an sawifiah. Mizoramah traffic rules ṭha taka zawm a nih dan te, dawhthei taka mipui chêt dan te, horn rî a tlem dan te, Aizawl chu 'Silent City' tia sawi ṭhin a nih thute an tarlang a ni.

Khawpui chhunga lirthei tlan dan leh chêt vel dan ṭha avanga Mizoramin chawi-mawina a dawng hi a lawmawm a; sorkara department ṭhenkhatte leh mipui, lirthei khalhtute vang a ni berin a rinawm.

Lawmman buatsaihtu leh petu hi Ministry of Housing and Urban Affairs lam an nih miau avangin Mizoram sorkara UDPA department hotute'n an dawng hi a àwm viau. Chutih rualin, kan khawpuia lirthei chêt velna chungchanga ruahmanna siamtu, a taka hma latu leh lirthei che vel vila enkawltu tak tak chu police (traffic police)-te an ni a, lirthei che vel enkawltu police-te hian fak an phú a ni.

Mizoramin award a dawn theih chhanah hian traffic police-te'n fak an phù viau rualin, department dangte hmalakna leh mipui thuawihna leh dawhtheihna rah chhuah a ni tel bawk. Sorkar lam mite leh mipuite vang, thawhhona leh ṭanrualna vang a ni a tih theih.

Digital media leh social media hrang hrangah Aizawl khawpuia lirthei chêt vel dan ṭha leh mawi te, lirthei khalhtute hawihhâwmnate tarlan a ni ṭhin a; hnam dangte'n Mizoram an fak phah ṭhin a, Mizoram mipui pawhin nuam kan ti ṭhin.

Aizawl khawpuia lirthei chêt vel dana Mizoram páwn lama kan hmingṭhatna hi chhawm nung zel turin ṭan la tlang ila; Mizoram leh Mizote tihmingchhetu leh timualphotu ni lo tura kan inven ṭheuh a pawimawh.

Khawpuia lirthei chêt vel danah traffic police lamin hawihhâwmna nen theihtawp chhuah zel se. Mipui, lirthei khalhtute pawhin lirthei kaihhnawih dante leh traffic rule-te thuawih tak leh ṭha taka kan zawm zel a pawimawh a; che mawi lo bik, hawihháwm lo bik ni lo tura kan inven ṭheuh a ngai.