YMA-in na zawkin kawng bawhzui se
Central YMA hruaitute chuan November 8, 2025 khan Vairengte leh Sairang inkar national highway kawng dinhmun an enfiah a; kawng siamtute chu hna thawh theih hun chhungin ṭha tak leh lungawithlak taka thawk zo hman ngei tura an chah bakah, hna an thawh dan an en zui zel dawn tih an hrilh.
YMA hian kumina an Inkhawmpui Lianah, "Mizoram chhunga inkalpawhna kawngpui hrang hrang a chhiat avanga mipuite'n harsatna kan tâwk nasa lutuk ṭhin hi a lo ziaawm theih nan Mizoram sorkarin tun aia chak zawkin hma la rawh se," tiin an rél a ni. YMA rorelna sang berin a rèl tawh CYMA hruaitute'n a taka an bawhzui nghal hi a lawmawm a, rah ṭha a chhuah ngei a beiseiawm.
CYMA President-in kawng siamtu company/contractor-te'n sum siamna atan ringawta Mizoram an hmang chu ṭha an tih loh thu te, ṭha taka kawng an siam thei lo a nih chuan inthiar fihlim tura hrilh mai an hreh dawn loh thu a lo sawi tawh. Kawng an endiknaah an beisei anga kawng siam a nih loh chuan kawng siamtute chu Mizoram chhuahsan tura an tih hun a awm lo ang tih a sawi theih loh thu a sawi bawk.
CYMA President thusawi aṭang hian YMA-in kawngpui chhia an vei tak zet a, Mizorama kawngpuite a ṭhat zawk theih nan chak takin hmalak an tum niin a ngaih theih a, a lawmawm. Thusawi aṭang hi chuan mipui tan pawh a thlamuanthlak viau a ni.
Hetih rual hian, thusawi ringawtah tawp loin, YMA rorelna sang berin a rêl tawh hi CYMA hian a takin bawhzui reng se, YMA sub-headquarters, group leh branch-te hmang ṭangkaiin hmun hrang hranga kawngpuite vil reng thei se. A ṭul a nih chuan na hrêk hrâwkin kawng siamtute nawr ṭhin se, awmzia a nei deuh nge ngein a rinawm.
YMA rorel hi ṭha taka an bawhzui reng a nih ngat chuan kawng siamtute pawhin chak zawk leh ṭha lehzualin hna an thawh a rinawm a; chutiang a nih chuan YMA hmalakna hi ram mipuiin a hlâwkna kan tel tlang dawn a ni.
CYMA hian kawng an diknaa an hmuh dante an la ngaihtuah sawi zui dawna sawi a ni a; uluk takin ngaihtuah se, Mizoramin kawngpui ṭha a neih theih nan theihtawp chhuah zui se a duhawm.