Silent period ṭha taka zawm a ṭul

Dampa assembly constituency by-election chu November 11, 2025, naktukah neih a ni dawn ta a, inthlan atana campaign theih hun pawh nimin November 9, Pathianni tlai dar 4 khan a tawp tawh a, tunah hian campaign phal tawh loh hun, silent period a ni mek.

Inthlanah hian dan chi hrang hrang zawm tur a awm a, chungte chu inthlanna dik leh thianghlim, ralmuang leh zalen a awm theihna tura duan vek a ni a, mi tinin ṭha taka kan zawm a pawimawh. Silent period ṭha taka zawm hi mi tin tih tur a ni a, political party mite leh candidate-te tan zawm a ṭul zual.

India ramah hian inthlan kaihhnawih dan hrang hrangte'n zawm a hlawh tâwk lo ṭhin a, sum tawktarh pawh a nasa ṭhin; hetiangah hian Mizoram a bâng bik lo niin a lang. Vote thlak hma ní leh zanah sum sem a nasa zuala sawi a ni ṭhin a, 'last minute' tih ṭawngkam pawh a lâr hle. Tun ṭum by-election neih turah hian vawiin leh zanin vel hi 'last minute' a ni a, fimkhur leh inven a ngaih lai ber hun a ni.

Zêp thu a chêng lo, sum sem, vote lei leh hralh ang chi hi Mizoramah chuan hnam tlem leh hnuaihnung zawk (minority) zingah a hluar ṭhin. Tuna by-election neihna tura khaw eng emaw zat chu minority-te awmna hmun a ni a, hei vang hian, tun 'last minute' ah hian sum sem a hluar tura ngaihna a lian niin a lang.

Sum sem leh vote lei hi tunah chuan indan tak tak a harsa tawh a, a chhan chu hmaichhanah sum faia inpe loin, khaw dang daih aṭangin online transaction hmangin awlsam taka a tih theih tawh vang a ni. Official lam aṭang chuan sum sem hi dan a harsa hle ang.

Vote lei tumna rilru put loh leh sum sem lo tura rilru dik put a pawimawh ber a, candidate-te leh party-te'n rilru dik an put a ngai. Pathian ringtu, Kristian kan nihna lantirna hun a ni chho mek.

Dampa bialah MLA by-election thianghlim taka neih a nih theih nan political party-te leh candidate-te an pawimawh ber a; dikna leh thil ṭha duh, party dangte thil dik lo tih haw em emtu vek an nih angin, rilru leh ngaihtuahna dik púa dik taka inthlan an hmachhawn a ngai a ni.