Damdawi kaihhnawihah fimkhur a ṭul

Serchhip District Registering Authority hotute November 6, 2025-a an ṭhutkhawmnaah Serchhip district-ah Clinical Establishment Act hnuaia inziah luh theih dan leh dan loa hma late hremna chungchang ngaihtuah a ni.

Serchhip district-ah clinic/laboratory reagister 28 an awm laiin, register loh clinic pakhat leh laboratory pakhat a awm thu tarlan a ni. Meeting kaihruaitu Bawrhsap chuan damdawi lama thiamna zîktluak nei lo leh doctor anga inchhál, damlo hnena damdawi chawh ṭhinte lakah fimkhur turin mipui a chah.

Serchhip district-ah Clinical Establishment Act hnuaia inziak lut lo an awm hi rang taka bawhzui a ṭul. Dan anga inziak lut thei an nih chuan an inziah luh ngei theih nan hmalak ni se, dan anga tling lo, inziak lut thei lo an nih chuan tihtawp a nih theih nan hmalak ni rawh se.

Khawpui dangah pawh Clinical Establishment Act hnuaia inziak lut lo clinic leh laboratory an awm nual mai thei a, district tina thuneitute'n an enfiah a ṭul. Aizawlah phei chuan clinic/laboratory a tam a, uluk lehzuala endik ni se, dan loa din leh dan anga tih turte ti lo an awm chuan action lak a ṭha ang.

Tun hma aṭangin Mizote zingah zirna nei chuang loa dam lohna thila hriatna leh thiamna eng emaw tak nei an lo awm tawh ṭhin; thil hrang hrangah an ṭangkai ṭhin a, nau chhar leh ruh lam kaihhnawihah phei chuan mipuiin an chhawr ṭangkai viau ṭhin.

Thiamna tak tak nei si loa sum duhna vanga thil ti pawh an lo awm tawh ṭhin a; chutiang mite lakah chuan fimkhur tlân a ngai. Damdawi lam kaihhnawiha min dàwrtu an awm pawhin ring nghal mai loin, an nihna tak hriat chian hmasak a ṭha a, thiamna zîktluak tak nei an nih loh chuan rin loh a ṭha zawk.

Zirna puitlinga zir chhuak ni lo, mahni hriat hriata inti hriate rin te, an damdawi chawh hmante hian nghawng ṭha lo leh thil pawi tak a thlen thei a; chutiang mite lakah chuan mi tin kan fimkhur hle a ngai a, sorkar pawm zirna hmuna zîktluak taka zir chhuakte rin a him ber tih hriat reng a ṭha.

Thiamna zîktluak tak nei lo leh dan loa damdawi lam kaihhnawih thil chi hrang hrang, mipui tana him lo thei bik an awm loh nan sorkara thuneitute pawhin ṭha taka an vila an ûmzui a ṭul bawk.