Khawiah nge tar pension 'old age pension' pawisa hi a awm?

India sorkar chuan India rama eng hnam pawh, eng sakhua betu pawh ni se kum upa (tar) te enkawl leh chawm nan awmze nei takin tar chawmna Old Age Pension a siam a. Chu chu India ram state hrang hrangah mumal taka kalpui a ni a, keini Mizoramah chuan a enkawltu a Nodal Department chu Social Welfare Department a ni.

Sorkar hmasa hunbi MNF sorkar hun lai kha chuan thla thum thla li dan­ah min pe ṭhin a, kan lak loh thla ral zawng zawng kha kan la vek ṭhin a, tar hote kan lawm em em ṭhin a nih kha. Engtizia nge ni ngai le? tun Congress sorkar hnuaiah hian min enkawltu Nodal Department a ngai tho an la ni si a, heti em ema tar pension min pek theih loh tak mai hi ni le?

Mirethei ṭawmkai tawh lo, engmah thawk thei tawh lo ho, sorkar ṭhatna zar zoa nung ve ṭawk ṭawk ho, tun sorkar hotute ber ṭawng­kam takin VIP hote kan mang a va han ang tak em! Rilṭam dangcharin kan ṭhu a, meialh enin kan ṭhu ngawi reng a ni ber tawh e. Tar pension hi sorkarin a titawp ta vek em ni?

A titawp a nih si loh chuan pitar/ putarho ten sorkarin min chawmna (tar pension) kan hmuh tur hun rei tak chhung sorkarin min bat sak tawh hi a rang thei ang berin min pe rawh se. College zirlaihote chuan an chanpual hmu turin sorkar auh eih nan kawng zawh ropui takin an huaihawt a, an thawm pawh a ring hle a nih kha.

College zirlaiten an chanpual 'Tribal Scholarship' ropui taka an nawr ang khan keini tarho chuan kan nawr ve thei si lo a, kawng zawh tura chhuak khawm thei pawh kan ni tawh lo. Awm­hmunah kan tar pension pawisa hi nghakhlel taka lo thlir mai hi kan tih ve theih tawk a ni tawh si a.

Mi thil hre zau deuhten an sawi dan chuan, 'India ram state dangte chuan thla tin tar pension hi an pe zat zat a, sorkarin rei tak tak a bat sak ve ngai lo' an ti ṭhin. Engtizia nge ni ta ngai? heti em ema tar pension hian ngaihsak a hlawh tak loh mai hi le?

Kum 80 chung lamte phei chuan thla khatah Rs. 550/- zel an la a, kum 80 hnuai lam hovin Rs. 250/- zel kan la a, sorkar tan chuan thil ropui tak a nih loh tehlul nen.

He ka thuziak mawl tak hian kan Mizoram Congress sorkar beng hi thleng phak ngei sela, tar pension min pek tur hi a bo a bang awm loin min pe chhuak vat se.

Pathian hmingin ka ngen e. Khawiah nge tar pension pawi­sa a awm?