RTE Act, 2009 hian bung (chapter) 7 a nei a, ṭhenhràn (section) 38 ten châng hrang hrang an nei. Tun ṭùmah hian Chapter 4, section 18-na 'No school to be established without obtaining certificate of recognition' hi i lo bih chiang teh ang.
He section hnuaia clause no 1 chuan ti hian a sawi : "He Act hi hman a nih hnu chuan, sawrkar leh khawtlang thuneitute hnen aṭangin phalna leh hriatpuina certificate la lo chuan school din emaw, kalpui emaw phal a ni lo," tiin.
No 5-ah, "Tu pawh phalna la lo va school hawng emaw, phalna sûtsak tawh si la hawng zui zelte chu cheng nuai khat thleng chawitir theih an ni ang a, a la tisual lui zel a nih chuan nikhatah cheng sing khat zel a tihsual chhung chu chawitir theih a ni,".
RTE Act, 2009 hi, Jammu & Kashmir tih loh India ram pumah 1st April 2010 aṭangin hman ṭan a ni.
He dân hman hnua dân kan zawm loh leh kan ngaih pawimawh loh vanga chhung lam min ei chhiat dan hre miah lo a, kum tam tak kan kal hnu pawha kan la harh chhuak thei lo fo leh, Education zung mawih ṭan mêk kan hmu thiam miah lo hi a ram pum huapa zirnaa kan hniam rawk rawkna a ni tih, mi eng zat takin chhût thiam ang maw?
He dân hman ṭan, kum 2010 aṭang chuan phalna la hmasa lova sikul din kha khap bur a ni a. Tin, phalna pe tur pawhin RTE Act, 2009 in sikul hawng tura a bituk leh phût (norms and standard) pha lote chu phalna pek loh tur a ni. Sikul ding tawh, phalna pek tawh pawh norms and standard pha lo chu a kharsak thei bawk a ni. Heti a ni chung chung pawh hian khaw tinah/veng hrang hrangah sikul thar a ding mawlh mawlh a, din tawh sa eng emaw zât tâwp mêk a lo awm ve zel bawk a. Chutiang chuan dân awpna hnuaiah dân hre lo leh pawisa lovin kan tal kual vel mai mai a. A nghâwng kan chhût pha meuh lo niin a lang. Ni e, thil reng reng hi a taka chenchilhtu tân lo chuan hriat loh pawh hi a awm viau tho mai.
Sikul pung reng mai hian eng nge a nghâwng?
Mahni vêng leh khua, sikul thar din deuh sekna, tlu chhe leh tam viau nachhante in chhût ve ngai em? Khua/veng mihring chêng phû loa sikul tamna hmunah chuan naupang leh nu leh paten duh hun huna sawn chhuahna tur nei inti takin zirtirtu leh school thuneitute an induh khûm thei a, trained teachers, sikula naupang enkawltu zawk kha nu leh pain ṭha an tih dana enkawltir tumin an chungtlâk fo mai. Naupang lahin an hlutna hre rànin sawisel tur an hmu hma êm êm a; an tuar a zuau a, an phun chiar a, zirtirtu tham lo an pung tial tial a. Chu boruak chhe tak karah chuan school hrang hranga zirtirtuten naupang an inṭàm chhuah a, naupang leh nu leh pate an intlawnsiak ta ṭhin. A ṭhenin Christmas thawmhnaw man tur an target, a ṭhenin gift eng eng emaw hmangin leh kawng hrang hrangin, ṭhenkhatin house to house campaign neiin an sâwm ngawng ngawng bawk a. Innovative Education hmanga inthlêm chu hla tak a ni. Tlâwn ngai tâ chuan thunun a ngaithei lo a, thunun ngaithei lo chu taimak a har a, taima lo chu a hlawhtling thei lo a, a tâwpna chu beidawnna leh retheihna a lo ni ta ṭhin a ni. Naupang a kalna awm kawnga kaltir tur pawhin ṭhenkhat hi chu zir chian hman pawh an ni lo. Kum tin insawn kual a, mahni khuaa sikul awm zawng zawnga lût kim vekte pawh zuk awm thei hiala maw le!
RTE Act, 2009, chapter V, section 29 clause 2 (f) ah chuan, Elementary school-ah naupang chuan a theih chen chen mahni pianpui ṭawng ngeiin an zir tur a ni a ti. Mahni ṭawnga lehkha zir chu a fiah bik êm êm laiin, sapṭawnga zir chu kan intihhmuh nasa tial tial a. A bik takin Mathematics leh Science-a kan hniam êm êm nachhan pawh ṭawng danga fiah lo riaia kan zir nasat vang a ni.
Kan Govt school (Elementary) te lah chu English Medium thlipui laka chhanhimna nia ngaiin, Mizo ṭawnga zirlai text book duhawm tak takte hnawlin, English Medium zirlai la lutin kan school upa tawh tak tak te chu English medium-a leh kan intihhmuhin phalna kan pe a. Middle school te phei chu pawl ruk aṭanga pawl riat chu English Medium-ah kan let ta a. Private English Medium thlipui laka inven nan hmanrua a tling mawlh lo. A tlin loh chhan hi phek tam tak daih ziah tur a awm ang. English Medium te nen lam hian Mizo ṭawng text book hmang ni ila, tun ai hian kan naute hi kum nga chhunga thiamna tak tak nei tura hma kan sawnna a lang chiang khawp ang. English subject bik hi bu hnih bu thum neih belh zawk ila, kan insawrbîng ang a, sapṭawngah pawh hma kan sawn phah daih zawk ang. Hriatthiamna tel loa zirna hian thli chhia ang maiin min lén kual vel a ni ber mai.
Tin, kan ramah hian zirtirtu ṭha leh tui tak tak tam tak an awm laiin, zirtirna tui hauh lo tam tak, education lam hawi reng reng chhiara ngaithla peih lo zirtirtu eng emaw zat leh, Mizo ṭawnga lo zirtir ṭhin zirtirtu thiam tak tak, mahse, sap ṭawnga zirtir a ngaih tak vanga phûr vak lo eng emaw zatten sapṭawngin an han inzirtir ta a. Kan sawtpui lo chu a nih hi. National Achievement Survey (NAS) ah pawn lam aṭanga min han teh meuh chuan, literacy rate ṭhat êm êmna state Mizoram hi a mawngah kan tla thla vawn vawn mai alawm! School hrang hrangte admission advertisement tam ber chu result percentage ṭha a ni a, skill development kan ngaih pawimawh lohzia a chiang. Chu chu kan ṭhànmawhbâwk a ni bawk.
Tin, school ang tho hian hostel siam kan awlsam lutuk leh hostel endik lama kan inthlahdah hi a pawi êm êm bawk a ni. Zirlai uniform ha chin awmna hostel hi uluk a ngai hle a ni. Hostel enkawltu thiamna bituk leh tehna mumal siam a pawimawh hle. Thingtlang emaw khawpui lama veng khata hostel a tam lutuk chuan an inṭàmchhuah a, discipline ngaithei lo naupangten a zalen apiang an thlang mai ṭhin a. Tlàn tauhna tur hre ràn enkawl hi a awlsam lo – a tawpah a tuartu chu zirlai bawk. Tichuan, thunun har zirlai chu khua leh tui ṭha takah a chhuak thei ṭhin lo a ni.
28, March, 2016 khan Education Department chuan hostel siam turte dan zawm tur leh hostel siam dan tura phût a neihte a tichhuak a. Khaw hrang hrangah zâwm a ni em? Permission nei loa hostel siam hi kan state-ah eng zat tak awm ang maw? Phalna nei loa an hawn mawlh mawlh chuan zirnain a tuar piah lamah, sual dang a piang thei tlat bawk a ni. Khua/Veng chhunga School enrollment azira hostel permission pawh hi pek chi tak a ni ang. Hmeichhia leh mipa hostel chêp taka dahkhawm te hi a fuh chiah lo. Ka khaw hlui a ni bawk a, school chhuanawm tak an nei bawk a, ngamtlakah entirnan hmang teh ang. Chhingchhip khuaa St, Peter's HSS hi khaw dang leh state dang aṭang pawhin kum tin naupang tam takin an pan a. He school behchhan hian an khua chuan hostel pasarih lai an nei a ni awm e. Inṭhatsiak lama inel aiin, naupang intlawnsiakah an tlân thuaiin a rinawm.
Aw le, Mizoram state mihring chêng zat chhûta school ngah êm êm hi kum tam tak kan lo inthlahdah tawhna ata, chhanchhuah kan nih theih nan sawrkar hian hma la se la, khaw tinin school nei ngei ngei tura hmalak a nih mek lai hian khaw tina school kan neih mekte zir chiang se, phalna (permission) nei lo school eng zat nge kan neih mêk? Phalna pêk tawh RTE Act 2009 in a phût norms and standard pha lo eng zat nge awm? Khaw khata Govt School hrang hranga naupang zat zir chian a, huaisen taka amalgamate ṭul ang chu kalpui a ṭha ang. Chu chuan Zirtirtu indaih lohna a su kiang ang a. School compound-te pawh vantlang tana hmasawnna sport complex leh culture centre din nan a hman zui theih bawk ang.
Sawrkar aṭanga phalna la hmasa loa school din a awm tawh loh nan leh, kalpui zui tlâk loh school-te tihtawp vat a nih theih nan, kan hotu rem hre tak takte khan theih tawpin hma la teh u. Kan chhiat zui zel hma hian khaw tin VC te kaltlanga puan zar ni teh se. Education department enkawlna kawngah hian village council/local council te hi tun aia hmân ṭangkaina tur RTE Act chungchang-ah chauh lo pawh hian a tam ngawt ang. Mizoram leh a mipuite hmasawn nan zirna inte bih chian ni se la, siam ṭhat hna thawk thei tura mawhphurhna nei zawng zawngten theih tawp u chhuah ang u.
- Jacinta Vanlalengzami
Headmaster, A&M Grandchild School
N. Vanlaiphai

- Jacinta Vanlalengzami  Headmaster

THE RIGHT OF CHILDREN TO FREE AND COMPULSORY EDUCATION ACT 2009 (RTE Act, 2009) (Dân kan pawisak loh vanga buaina hian kan zirna nasa takin a tihniam zel)

A KAMKÊUNA
Mi hausa leh mi rethei an awm za a, an vaia siamtu LALPA a ni. Mi hausa chuan a sum chu a kulhpui a ni a, A suangtuah danah chuan kulh sâng tak a ni. Mi hausa sum chu a khawpui nghet a ni a; Mi rethei boralna chu an pachhiatna a ni. Nulahovi’n - "Sum ngah ngah hmelṭha, rethei hmelṭhain awmzia a nei lo," an tih ang maiin khawvela kan awm chhungin ram hausa, ram intodelh mimal hausa, chhungkaw intodelhte hian an hausakna hi ralthuamah an hmang a; an hausakna hi an kulhbingsang a ni mek.
Mi rethei chu a ṭhenawmte ngei pawhin an hua a, mi hausa erawh chuan ṭhian tam an nei tih Pathian thuah kan hmu. Rethei chu tu ma'n an zah lo va, mi hausa erawh chu hmelchhe tak leh piangsual pawh ni se, miin an zahin mi fingah an ngai ṭhin. Khawvel ram leh sorkar pawh hi an retheiha an intodelh loh chuan tu ma'n an ngaisang ngai lova, kal pawh an chak ngai lo.
Chutiang zelin an intodelha an ram a hausak erawh chuan kal an chàkin hmuh an chàk hle ṭhin. USA pawh khawvel hnam tin kal/awm/hmuh kan chakna chhan chu an ram a intodelh a, a hausak vang a ni.
TU RAM NGE HAUSA?
Kumin 2024 hian Luxembourg hi mi pakhat GDP aṭanga thlir chuan khawvela ram hausa ber a ni. Gross Domestic Product (GDP) hi ram leh hnam mipuite sum leh pai lama an hausak dan tehna atan hman a ni a, khawvel pumah GDP aṭanga thlir chuan khawvela ram hausa ber a ni. GDP aṭanga teha khawvel ram hausa palite chu :- Luxembourg 143,304; Ireland 137,638; Singapore 133,108 leh Qatar 114,210-te an ni. Kan Zoram hi chuan hausak leh intodelh hi chu kan la hlat deuh!
Kum 2024-25 chhunga Mizorama Gross State Domestic Product (GSDP) (tuna man anga) chu cheng vaibelchhe 48,038 ni tura ruahman a ni a, kum 2023-24 aiin 22% zetin a pung dawn a ni. Kum 2024-25 chhunga sum hman (leiba rulhna tel lovin) chu cheng vaibelchhe 13,786 vel nia chhut a ni a, kum 2023-24-a estimate siamṭhat aiin 6%-in a tlahniam a ni. Ṭan kan lak nasat a ngai hle.
U.S. HAUSAK DAN HI?
United States-a pawisa hman zat zawng zawng chu kum 2022 khan U.S. dollar tluklehdingawn 2.26 vel a ni a, kum hmasa aiin a pung tlem hle. September 20, 2023 thleng khan Federal Reserve chuan pawisa hman zat zawng zawng chu US dollar tluklehdingawn 2.33 vel niin a chhut. Khawvel economy ram lian deuh deuh pangate chu : United States of America, China, Japan, India, Germany-te hi kum 2024 chhung khan khawvela economy lian ber an ni a, an GDP data aṭanga a lan dan chuan.
GDP hi hnam pakhat economy len tham zia tehna atana tehkhawng (key metric) a ni. An indawt dan chu hetiangin- USA $23 trillion. China $16.9trillion. Japan $ 5.4 trillion. India. $ 4.8 trillion Germany $ 4.4 trillion. US hi a sang fal hle a, China pawhin $7 trillion-in a la phak lo va, India a ṭhang duang hle a, Germany tlan pelin Japan a pha teuh tawh hle.
US hian sum a ngah hle a, Kum tinin United States chuan a himna, sum leh pai, leh mihringte tana ṭhatna tûr zawngin khawvêl puma a hlawkna hmutute hnênah ṭanpuina dollar tluklehdingawn tam tak a pe ṭhin a, Israel tih lohah chuan ram dang zawng aiin Ukraine tan a thawn tam zâwk a ni. Kum 2022 February thlaa Russia-in a rawn beih hnuah Ukraine chu U.S. aṭanga ṭanpuina dawngtu zingah a langsar ber a ni. Hei hi Indopui II-na hnua Harry S. Truman administration-in Marshall Plan hmanga continent siamṭhatna tura sum tam tak a hriattir hnua Europe ram pakhatin a dawn tam ber ṭum a ni.
ISRAEL TAN VE THUNG
Israel hian U.S. ṭanpuina (aid) eng zat nge a dawn tawh tih hi kan chhut ngai lo mai thei? Israel hi a din tirh aṭangin ram dang - U.S. aṭanga ṭanpuina dawng tam ber a ni a, economic leh military lama ṭanpuina zawng zawngah dollar tluklehdingawn 300 vel (inflation aṭanga siamrem) vel a dawng tawh a ni. Ukraine tan hian $ 75 billion phalsak an nih laiin Israel ṭanpuina ve thung chu $ 300 Billion a tling tawh a, hei mai bak hian ralthuam changkang tak tak a pe reng bawk a, a inthlau rem rem hle mai.
US Scientist tam ber leh mi thiam an thluak bur ber berte khu Juda Pachal deuh vek an ni emaw tih mai tur a ni. Pathianin US leilung hausak malsawmna tam tak a pek hi Israel tan chuan vanneihna ropui tak a ni, a va ropui tehlul êm!
A TLÃNGKAWMNA
Kan Pathian engkim tithei leh rorel thiam tak hian Ami Israel fate hi a phatsan ngai lo. Khawvel economy lian ber leh ropui berah USA A'n dah vah maite hian awmze thuk tak a nei. Communist sorkar China-te hi hausa ber ta se, tun dinhmunahte hian Israel tan chet lak a harin an khawngaihthlak ngawt ang. Khawvela ram hausa ber tur dik tak Lalpa'n USA A târ chhuak hi a va'n ropui danglam tehlul êm! USA sum ngah dan leh hausak dan turu buru lutuk hi tun dinhmunah khûm mai tur an la vãng hle. 
US hi awm lo ta se, Muslim sorkar-ho hian Israel hi an ching rethei ngawt ang. Tunah pawh Hamas nen thla li an inbei tawh ahnu hmanah Iran-in a rawn bei zui leh a, US hian chhan tlat lo se, a economy-in a tuar nasa tawh si a, rei a daih tawh lo vang. Mahse, US-in theihtawpa a ṭanpui zel avangin a la dam khawchhuak hram hram a ni.
Hetih lai kara kan Zoram state te reuh tê, hriau pakhat pawh la siam ve thiam lo leh India hmar chhak kilkhawra chengte hian eirûkna leh eilanna nen, dikna chanve leh hlemhlêtna chi hrang hrang nen, mipui chanai development sum pawt penga kan la han inchhekarbawm ṭhin hi chu zah nachang hriat a va hun tawh tehlul êm! 
USA hruaitute khuan khuti tak khuan an ram hmangaih lo se, Pathian pawhin mal a sawm lo vang a, heti tak hian an hausa hauh lo vang. Zak miah lova mipui chanai sum eiru chunga Pulpit chum thum dum dum ṭhinte hian USA hi kan entawn a va hun tawh tehlul êm. Mi tinte leh kan politician tinte hi tihtakzetin I inngaihtuah chiang mawlh teh ang u.
- Dr. C. Lalrampana

﻿﻿-Dr. C. Lalrampana

USA AWM LO TA SE?

Vanglaini April ni 24, 2024 chhuakah chuan Champhai South leh Champhai North Assembly bial joint village council te thuchhuak a rawn ziak a, an thuchhuakah chuan an huam chhûnga chhiatna emaw a awmin, media-a târlan ngai a awm chuan journalist-te hnenah chauh thil thleng chanchin sawi chhuah tawh an rêl, tih thu hi a ni a. A ṭha ka ti hle mai. An sawi zaunaah chuan journalist te chuan a him chin leh mipui hriat tur chin an thlit fim ṭhin thu leh, mi dangte erawh chuan thlifim lova an puanzar mai ṭhin avangin thu thehdarh turah fimkhur ṭul an tih thu an sawi bawk a. Hemi ni vêk Vanglaini phêk hnuai lamah hian Youtube channel pakhatin Saitual district chhûnga Lok Sabha inthlana lirthei hman dan chungchangah, thudik tâwk lo a lo tihchhuah avanga Saitual Bawrhsap Dr Lalngura Tlau sawi fiahna kan hmu bawk a. Champhai South leh North joint village council thuchhuak hi kan tunlai media khawvela kan mamawh tak niin ka hria.
Champhai South leh North Joint Village ten journalist ni lo 'mi dang' an tih hian rilruah kan Youtuber te an lo lang nghal a. Youtuber te an sawina a ni em tih erawh ka hre lo. Mahse, rilru chuan journalist ni lo, thu thar leh chanchin thleng thehdarhtute chu youtuber te hi an ni deuh ber em a ti a, chu bâkah chuan social media site ṭhenkhat facebook leh whatsapp te pawh a kâwk tel thei awm e. Kan Youtuber te bik hi han luhchilh ila. Khatia Youtube khawvel lama kan ṭhan harh a, kan han buaipui chhoh ṭan tirh aṭang tawh khan khatia kan journalist pangngaite ai maha thu thar thehdarh kawnga an kut a ran zawk tàk hnu khan; rilruah zawhna a lo awm ve ṭhin a, chu chu - heng kan Youtuber te hi journalist association lamah hian an in-affiliate ve em le? tih hi a ni.
Hetia social media lama tute mai pawh self-style journalist kan nih tak sup sup hnu hian thlitfim awm miah lovin kan duh duh kan chhuah ta pawp pawp a, a nghawng tur hi kan dáwn vak lo ni te pawhin a lang a. Kan duh lam hawi hawi, mipui mit leh beng la thei tur nia kan hriat tawh phawt chu accident aṭanga thlarau hur thlengin, thlitfim awm miah lovin mipuiah kan inhlui ta bawrh bawrh mai ṭhin a nia, a sawp chu nasa tak a ni. Hei hian nasa takin kan vantlang nunah nghawng a nei a, a entu tam ber kan ṭhalaite rilruah a ṭha lo zawngin nghawng a nei nasa êm êm a ni.
A tira post-tute chauh ni lo, a hnu zela lo suan kualtute thleng hian kan fimkhur a ṭha mang e! Tlêm lai deuha thlarau hur an tih mai, inneihna maksak leh an khawsak dan bawraw tak tak, naupang deuhte tân phei chuan en him lo khawpa serh leh sáng awm miah lova an khawsa lai video kan thehdarhsak vak vakte khàn, a ṭha zawngin nghawng a nei lo mai ni lovin, tute'n emaw lo khawngaiha an thlavang hauhsaktu an nei hlauh zawkte kha a mak a, tun hnaiah pawh hmeichhe pakhat video, 'Isua kha khenbeh a ni lo, mi dang zawk a ni an khenbeh' tih thu, thu vuvûk mai mai chu kan ti-viral leh chiam a, kan thehdarhsak a, group hrang hrangah kan post kualsak vak vak a. Hetiang zela kan kal chuan kan tum loh deuh deuh hian thubuai kan la awrh fo lo vang tih a sawi theih loh. 'Mi áin an át man an chawi seng lo' tih zawng zawng hi kan neih zo palh ang tih pawh a hlauhawm hlel lo ve.
Youtube hi kan en nasa a, Youtuber pawh kan ngah ta hle. Heng kan Youtuber-te hi sumdawng an ni a, sum hmuh nana ti an nih avangin an content leh an video-te hi mipui mit la tur leh, mipui en duh tur an zawn a, an ngaihtuah a ngai a, chu lam kawngah chuan an tihtur an ti a ni ve mai a. Dem lutuk tur pawh an ni lo. Mahse, subscriber leh viewers ngah duh luat avanga a nawlpui tana him lo leh thu belhchian dawl lo thleng thlenga tihchhuah vak vak erawh hi chu fimkhur deuh se a duhawm ngawt mai. Naupang zâwk leh ṭhalaite tana en him lo thlenga thlitfim awm tawh chuang lova kan tichhuak vak vakte hi kan hnam tân a la pawi thei a, a hnam ang pawha kan mualphona thlentu a ni thei. Kan hnung lawka Lok Sabha inthlan vuakvetah pawh mipui tana awih tur nge awih loh tur tih inhnial theih tak thu lêngvak a tam êm êm a, khawi ber nge thudik tih pawh hriat hleih theih loh khawpin thu kan vawrh darh chiam chiam a, ṭangkaina leh sâwtna awm lovah kan hun kan khawhral vak vak a, thil ṭha ber ni pawhin a lang lo.
Mi ramah chuan investigating journalist an awm ṭhin a, chu'ngte chuan thil dik lo an chhui a, mipui tâna ṭangkai turin an thehdarh a, mipui hnenah thudik an puang a, zirtirna dik an pe ṭhin. Keini chu mi accident lai tak te, mi in tlu lai takte cut ṭhen leh edit awm miah lovin a ngai ngaiin kan tichhuak pawp pawp a, mi rilru kan tina palh thei ang em tih lam kan ngaihtuah vak tawh lo.
Kan Youtuber te hnênah hei hi kan chah duh. Mipui ngaihven zawng leh mipui tâna bengvarna in tihchhuah tam tak hi kan sâwtpui a, kan hlâwkpui. Mahse, tunlai social media khawvel hi thil engkim a awlsam rualin fimkhur a ngai tial tial a, kan Youtuber te pawh hian journalist anga an in-affiliate chiah loh pawhin journalism ethics hi zir nasa lehzual deuh se, mipui tana him chin leh mipui tâna ṭha tur chin tihchhuah kawngah hian inel deuh deuh se la, fimkhur takin kalpui deuh deuh se la, an thu chhuah turte thlifim taima se, kan ram leh hnam tân tun aiin an ṭangkai lehzual ngeiin a rinawm.
Chuti a nih loh chuan tum loh deuha thubuai awrh nawlh nawlh a hlauhawm palh thei. Mizo hi kan rilru a ṭhain mi khawngaihna kan ngah a, ngaihdam kan indil hian thubuaia la lem lovin kan inrem leh mai thei zawk a, mahse nakin zelah chuan mi hi an fimkhur tial tial dawn a, thubuaia inkhin hi kan hreh lo tial tial mai thei ve bawk. Kan video mai bákah kan ṭawngkauchheh thleng hian mi pawi kan sawi palh thei tih hre reng chunga video te pawh kan siam a ṭul tial tial ang. Rahul Gandhi-a ṭawngkam khat lekin MP a nihna aṭangin a chawlhtir thei a, a buai zui phah hrep tih kha kan theihnghilh loh a ṭha ang. Chuvangin fimkhur a ṭha ber.
Mipui pawh hi kan insiam ṭhat a ngai ve tho awm e. Hre hmasa nih chákna thlarau hian min bual á hneh tawh khawp a, post darh hmasa nih chák lutuknate hian min bual á zo tawh a, kan kut zungpui hi kan vêng hneh ta meuh lo. Mi thu post apiang lo suan kual zung zung chi hi kan tam khawp a, a him leh him loh te, a ṭhat leh ṭhat loh te, ngaihtuah lem lova lo suan kual zung zung hi sim deuh a ṭha. Whatsapp group awmna ngah deuh phei chuan thu ngai hi kan chhiar nawn tluk tluk mai a ni. Maksak leh dangdai kan lâwm lutukte hi a ṭha ber lo. Kan ṭhatpuina lam aiin kan chhiatpuina a tam zâwk awm e.
He khawvel hmasawnna chak tak kárah hian, thil engkim mai awlsamna leh hahdamna lo pung zêl kârah hian kan khawsakte awlsamin, engkim hi kan ban phákah awm tawh mah se, fimkhurna hi a pawimawh ngaiin a la pawimawh reng tih i theihnghilh lo vang u. Kan khawvel a changkan zawh poh leh nun fimkhur a ngai tial tial tih hi, pahnih leh pahnih belh pali a nih chhûng chuan a dik reng fo ang.
- P.C.Nghàklianmáwia

- P.C.Nghàklianmáwia

I FIMKHUR TLÂNG ANG U

Mizoten khawhar in/mitthiina lengkhawm hla kan sak tam zinga mi leh hla lungkuai tak sak nuam em em, hla lar tak ni bawk chu HAN THLIR TEH U ROMEI ZAM KARAH tih hla a ni. He hla lo pian chhuah dan hi tun ṭum chu thai lang teh ang.
He hla lo pian chhuah chhan ber leh a changtu pa ber ni bawk chu Chhunthanga a ni a. Leng khuaa an awm laiin tleirawl té niin nupui atan Lawngthluaii a nei a. Tleirawl inngaihzawn laia innei an ni bawk a, an induh tawnin an inngai em em a ni. An inhmangaihna tizual turin Lawngthluaii chuan nau paiin, an inneih aṭanga thla kuaah Lawnthluaii chuan thla ruk mi nau pai chungin a thi a ni.
Chhunthanga chuan chutianga a nupuiin a thihsan chu tuar thiam har a ti em em a, a lung leng lutuk chu awm ngaihna a hre lo a ni ber mai. A nupuiin a thihsan a tawrh nat em avangin khawhar in riak an ṭin vek tawh hnuah pawh a ṭhian Lalruala chuan a la riahpui ṭhin a. Zan khat chu mumang mak tak mai a nei a, chu a mumangah chuan Chhunthanga chuan a nupui chu Aizawla Bazar mipui zi nuai nuai karah hmu nawlh hian a inhre tlat a, a zawng ta vak vak mai a, zawng hmu zo lova beidawng taka Rahsi veng lama a kir lai chuan van lam a thlir chho ta a, chu tlang chu thengthaw nuam em em leh mawi em em mai hi a han hmu ta a, chu tlang chung zawl pan theihna tur chuan lung kailawn nalh em em mai hi a han hmu bawk a ni.
Chhunthanga chuan chu lung kailawn awm zui mai chu a zawh chho ta a, a han thlen chhoh chuan tlang chung zawl, phul rai dup leh nawm hmel em em mai hi a han hmu ta a ni. Chumi hmunah chuan a nupui chu a awm ngei ringin a hawi kual vel ruai a, chutia a hawi kual vel lai chuan mihring; a vár veka inthuam mi pariat vel hi hlim hmel leh nuam ti em em hmel hian Cinema-a Slow Motion ang deuh hian an rawn pen rual a, hlim taka zaiin an zinga pakhat chu Chhunthanga chuan a nupui duh tak leh a ngaih em em, mumang thleng pawha a lo zawn ṭhin Lawngthluaii ngei mai chu a ni tih hriain a hmu ta a.
Gate pawn lam aṭang chuan a au vak vak a, Chhunthanga chuan, "Hetah hian maw i lo awm reng, eng ngati nge min hrilh loh, ka zawng ka zawng che a, daileng pawhin ka kalsan ngam lo che a, ka nghak reng che asin," tiin a au ta vak mai a ni. Chutia a nupui a va au zawh chuan anniho chu an inher siau va, an bante vaiin KAN LENG DIAL DIAL LUNGRUAL KIMIN, tih hla hi sa chungin an kalsan leh ta a ni.
Chutia an kal liam ta mai chu Chhunthanga chuan a tuar thiam lo hle mai a, a lung a leng lutuk chu a tlu tawp mai a, lung chhe vankaiin a ṭap ta hawm hawm a, chutia a ṭap chu a ṭhianpa amah riahpuitu Lalruala chuan a lo hria a, "Chhunthang tho rawh, i zahpuiawm em mai. Eng nge i ṭah thlawrh thlawrh," tiin a hau a. A harh chhuah hnu pawh chuan a nupuite hla sak chu a bengah a la cham reng a, tichuan khawvar velah an khuaa hla phuah thiam Saihnuna leh zai thiam, Liantawna te punin a thu leh a hla thluk an siam rem ta a ni. He hla phuahtu chungchangah hian sawi dan hrang hrang awm bawk mah se mimal phuah ni lovin Chhunthanga, Saihnuna, leh Liantawna te phuah a ni.
- George L. Ralte, Vaivakawn