Mipui candidate tur an puang

April 11, 2019-a Lok Sabha inthlanpui leh Aizawl West-I Assembly bye-election-a 'Mipui candidate' tia an vuahte chu nimin khan Aijal Club-ah puan a ni. Lok Sabha inthlana an candidate tur chu Lalnghinglova Hmar (Tetea), Aizawl Venglai niin, MLA bye-election-a an candidate tur chu Lalbuanga Sailo, Chawnpui a ni a; an chhinchhiahna (symbol) tur chu rìn kil thum nei (triangle) a ni.  Heng candidate-te hi Congress party leh ZPM-in an thlawp dawn a ni.

Candidate puanna inkhawm hi MPCC treasurer H Liansailova'n a kaihruai a, ZPM leader K Sapdanga'n candidate turte a puang. MPCC general secretary C Chawngkunga leh ZPM senior vice chairman Dr Kenneth Chawngliana ten 'Mipui candidate' siam tura Congress party leh ZPM an thawh dun chhan an sawi. 

Dr. Kenneth Chawngliana chuan kum chanve em pawh la liam loa politics-a nasa taka inbei ni si, eng vanga Congress party leh ZPM te hi tuna taka thawk ho leh thei ta mai si nge an nih Zoram mipuiten an hriat chian a ngaih thu a sawi.

Mizorama ruling party nilai mek hi central lama Hindutva chawisangtu leh ram dang mi dan loa India rama lo lut rute India khua leh tui ngheta awlsam zawka Citizenship Amendment Bill-2016 hmanga khungluh tumtu sangawi zawnpuite an nih thu sawiin Dr. Kenneth Chawngliana chuan, "BJP kal dan dik lote do chhunzawm zel ngam tur Mizoramin MP atan kan thlan tlin ngei ngaia kan hriat avanga ‘Mipui Candidate’ nei tlang mai kan ni a, tuna kan thawhhona hian nakin zela thawh ho zel tumna a kawk lo," a ti.

C Chawngkunga chuan ZPM-te nen an inbiak dawnin an hotute'n an party symbol 'kutphah' em chu hum tura an chah thu sawiin, "Kan han inbia a, kan symbol aia pawimawh zawk kan ram, kan hnam leh kan sakhaw humhim a pawimawhzia ka hmuh tak avangin kan hotute thu min chah angin kutphah pawh ka hum ta lo a, mipui candidate thlawp kan ti tlu ta a ni," a ti a, BJP avanga kan ram, kan hnam leh kan sakhua him lo mek humhimna atana kutphah a humhim lo chu an hotute pawhin an pawmpui thu a sawi. 

K Sapdanga chuan, BJP thil tum chu do let a ṭul tih an hriat thu sawiin, "Tualchhung politics-ah chuan nimin lawka nasa taka inbei kan nih hre rengin, nakin lawkah kan la inep leh tho ang tih pawm chungin, tun dinhmunah kan hnam leh kan sakhuain chhantu a ngai si a, party mal hmakhua leh thil dang dahṭha rihin, chhanhim hna thawhho kan rel ta a ni," a ti.

Aizawl West-I biala MLA candidate tur Lalbuanga Sailo chuan, CAB dona tura candidate a nih chhung chuan theihtawp chhuahin a ṭang tlat dawn tih a sawi a, "Vawi­inah hian indona pahnih kan hmachhawn dawn a, BJP kuangkuahtu leh BJP hmaa ṭhing­-

ṭhi ve ngai lote kan inhmachhawn dawn. BJP kuangkuah ve ngai miah lo, an hmaa ṭhingṭhi ve lote candidate ka ni hi ka inchhuang a ni," a ti. 

MP candidate tur Lalnghinglova Hmar chuan, Mizoram inthlanpui neih dawnah tun hma aṭangin political party hrang hrangin candidate atan sawm ve tawh ṭhin mah se, politics-a luh a rilruah a awm ngai lo tih a sawi. Mizo ṭhalaite chu India ramah an lang ve tur a ni, tih chu a ngaihdan a ni tih sawiin, "Parliament kan thlir a, hnam dang chu kum 30/40 rualte pawh ram rorelnaah an tel thei. Mizo ṭhalaite hi India ram rorelna sangah kan tling ve tâwk tih lantir ka duh a, ka tling a nih chuan Lok Sabha-ah Mizoram leh hnam tan ka au ngei ang," a ti.

Lok Sabha inthlan awm tur chu CAB duh leh duh lo inbeihna a ni tih sawiin Lalnghinglova chuan, "CAB hi kan duh lo a nih chuan Lok Sabha-a CAB titlang duhtu lam hi kan do mai tur a ni. CAB duh lo chuan CAB duhtu kan do ang a, kan thawhpui lo mai tur a ni. CAB dotu mai ni lo, CAB duhtute ep zawnga ding tur ka ni," a ti a; BJP-te chuan Lok Sabha-ah an tling leh a nih chuan CAB tharthawh an tum thu a sawi.

Lalnghinglova Hmar chuan, Mizo ram, hnam leh sakhua a him theih nan Mizoram mipuite an ṭan rual a ṭul thu sawiin, "Tun hi party bil dahṭhaa Lok Sabha-a Mizoram, Mizo hnam leh sakhua a himna tura kan pên chhuah hun a ni a, chutiang tur chuan mipui candidate atan ka inpe a ni," a ti. 



Share this Post

Login to comment
No Comments