Mizorama dan loa khaw din chungchang MSU-in MKHC leh Lunglei SP an sawipui

Mizo Students’ Union (MSU) Gen. Hqrs. hruaitute chuan March 12, Thawhlehni khan Lunglei district-a dan loa khaw din chungchangah Lunglei SP C Lalthanmawia an hmu a, tlai lamah Mizoram Kohhran Hruaitute Committee (MKHC) hruaitute an hmu bawk.

Lunglei SP an kawmnaah MSU president Vanlalliana Khiang­te chuan, Lunglei district-a dan loa khaw din - Tuichawng­chhuah leh khaw dang chung­chang a sawi a, "Kum 2015-a dan loa khaw din Tuichawngchhuah eviction order awm tawh leh August 2018-a High Court order awm vek tawh si, tun thlenga hmalakna a la awm lo hi MSU chuan mak a ti a, LAD muan vangah a ngai tlat a ni," a ti a; dan loa khaw dinte ṭhiah ngei a nih theih nan MSU-in hma an lak reng thu a sawi.

MSU hruaitu dang mi parukte chuan Synod Moderator pisaah MKHC chairman Rev. R Lalhmingthanga leh Rev. R Lalrinsanga te an kâwm a; Mizoram chhunga dan loa khaw dinte chungchang bawk an sawipui.

MSU hruaitute chuan, Mizorama dan loa khaw dinte nuaibo a nih theih nan ṭanrual a pawimawh thu sawiin, "Kohhran hrang hrang rawngbawlna kawngah, dan loa khaw dinahte sikul building, tui connection, power supply leh thil dang hmasawnna a awm theihna atana hmalakna awm ṭhin hi tihtawp a nih theih nan kan 

ṭanrual a ngai a ni," an ti a; Mizoram, Kristian zaa za awmna ram a nih theih nana kohhran hmalakna an thlâwp rualin, ram leh hnam himna ngaihtuah tel ṭul an tih thu an sawi.

MSU thu thlen chungchangah hian MKHC hruaitute chuan, pawimawh an tih thu sawiin, MKHC meeting hmasa berah chhawpchhuah an tum thu an lo hrilh a ni.



Share this Post

Login to comment
No Comments