Kawng chhâwng siam ngei kan tum - Zoramthanga

Nimin khan Assem­bly budget session chhunzawm a ni a; MNF member F Lalnunmawia put luh, House-a Governor thusawia lawmthu sawina chu pawm a ni. Sawihona khaikhawmtu chief minister Zoramthanga chuan, Aizawl khawpuiah kawng chhâwng siam ngei an tum thu a sawi.

ZPM Legislature Party leader Lalduhoma'n Governor thusawiah Aizawla kawng chhâwng siam tum thu tarlan a nih loh thu a sawi chung­changah Chief Minister chuan, "Kawng chhâwng tih kan tum ngei, amah­erawhchu, kan thil tum zawng zawng kan ziak kim hman lo. Hmun thuma flyover siam tur chu hmalak hmasakna a nih avangin tarlan a ni. Flyover siam hna hi 

ṭan theih thuai kan beisei a, sum pawh Central-in a thuphungin an pawm tawh. A dang pawh kalpui chhoh zel kan tum," a ti.

Zoramthanga chuan, sorkarna an chan thla hnih chhung vel lekin bul ṭan tlem azawng chauh loh chu tih tak tak an la neih loh thu sawiin, "Sorkar hmasain tih fuh loh tam tak an neih rualin, tih fuh tak tak, lawmthu sawina tur tam tak kan nei. Keini tih tlemtê bakah kan hmaa mite thil tihah lawmthu sawina tur kan ngah," a ti a; Governor thusawiah an hmachhawp zawng zawng tarlan a nih chuan, a ninawm tham dawn avangin a pawimawh zual chauh tarlan a nih thu a sawi.

Assam Rifles sawn chhuah chungchangah CM Zorama chuan, "Kan tum chu ram kan leisakah khan dah vek a ni. Aizawla an hmun zawng zawng chhuahsantir kan tum. Inpeih tâwk lohnate a awm chuan a tahtawl deuhte pawhin an chhuahsan mai thei. Zokhawsanga an hmun hi Aizawla an hmun luah let a ni a, an vaiin an leng vek. A hmunhmá hi an chhuahsan vek kan beisei a, a ṭul a nih chuan nawrte pawh kan innawr ang a, innawr a ngaih kher ka ring lo," a ti.

Chief Minister chuan, Aizawl khawpuia buaipuiawm ber chu traffic jam a nih thu sawiin, "Politician-te chu sorkar hnathawkah ringawt an innghat tur a ni lo a, vision an nei tur a ni. Vision hi a tûka tihhlawhtlin nghal ngawt thei a ni lo a, kum 4/5 duh te, a aia hun rei zawk duhte a awm. Kan vision-te chak zawka kalpui kan tum. Parking chungchanga kan sorkar hmasaka kan hlawhchhamna kan pawm a, tihfuh loh lai aṭangin kan inzir thiam a ni," a ti a; traffic jam tihrehna atan ngaihtuahna a sên nasat thu a sawi.

Aizawl khawpui chhung kawng dunga lirthei dah a nih lohna atana ruahmanna an siam, Parking House Support Scheme (PAHOSS) chu an inchuh nghal nia sawiin Zoramthanga chuan, "Inthlan puan leh financial year tawpin min nangching a, thil a tih tak tak theih rih loh. PAHOSS atan hian financial year tharah sum tam zawk kan dah ang," a ti.

ZPM member Lal­duhoma'n, inthlan cam­paign laiin MNF hruai­tute'n SEDP hnuaiah NLUP dawng tawhte pawh cheng nuai thum an pek tur thu an sawi lai a, Governor speech-a a sema sem a nih loh tur thu tarlan a nih chungchangah Chief Minister chuan, "Cheng nuai 3 tih khan cheng nuai 3 kherte pawh a ngai lo thei. A ṭhenah chuan indâwm kâng tak tak tur chuan a aia tamte pawh a ngai mai thei," a ti a; SEDP chu duh duha hman tur ni loin, society kaltlangin sem a nih tur thu a sawi. 



Share this Post

Login to comment
No Comments