MNF-in candidate tur an puang

MNF chuan nimin khan Mizo Hnam Rûnah April 11, 2019-a inthlan awm tura an candidate turte an puang a; Lok Sabha inthlana an candidate tur chu C Lalrosanga, Tuikual North a ni a, Aizawl West-I Assembly bye-election-a an candidate tur chu Zothantluanga, Zotlang, Aizawlte an ni.

Candidate puangtu MNF president Zoramthanga chuan, "Inthlan kan hmachhawn mai turah hian zu zawrh duh leh duh lo kan inbei dawn. ZPM hruaitu tam tak hi zu zawrh duh, zu zawrh sawimawia lehkhabute hial siam an ni. Congress lah kan hria a, zu zuartute an ni a, an zu lo zawrh titawp turin Assembly-ah pawh khapna dan pass turin kan inruahman mek lai a ni. Zoram mipuite hian zu zawrh duhte nge kan duh zawk, zu zawrh duh lo te, tih hi tehna tur a ni dawn," a ti.

MNF President chuan, eptu lamin BJP nen ṭang dûnah an puh leh dawn tih sawiin, "BJP-in candidate hran an nei dawn a, keini'n kan nei bawk a, kan ṭang dun lo. 'NDA-a thawk ho' an tih chuan, ZNP leh MPC pawh NDA member an ni. Kum 2014-a Prime Minister hnena kan lehkha thehluhah pawh Pu Duha leh Pu Hmangaiha hming sign a awm thlap a ni tih kan hriat kha," a ti a; MNF chu ram leh hnam humhimna atana kum 20 chhung India do tawh an nih avangin an thu thua awm tur an nih loh thu a sawi.

Lok Sabha-a MNF candidate tur C Lalro­sanga, Doordharsan-a director general hlui chuan, hmasawnna inkhairual lo lutuk hmutu a nih thu a sawi a, "Ram leh hnam tan tih theih ka nei ve em tih ka ngaihtuah ṭhin. MP-ah hian chumi atan chuan kawng inhawngin ka hria. Parliament-ah hian ka mikhual bik lo a, committee péng hrang hrangahte telin, MP ṭangkaizia leh pawimawhzia hmutu ka ni. Nasa zawka Pathian leh ram tana rawngbawlna kawng a inhawng a ni," a ti.

C Lalrosanga chuan, CAB chu MNF-in an duh loh a nih thu sawiin, "MP-a thlan tlin ka nih chuan ka dodal ve ngei ngei tur a ni. MP ka ni ve a nih chuan Kristian dodalna leh nêkchêpna ka do zel dawn a, dan hmangin ka bei let nghal zel turah ka ngai," a ti a; ramri humhim tur pawhin theihtawp a chhuah tur thu a sawi.

MLA candidate tur Zothantluanga chuan, chhiarkawp hmanga chawh chuan tling lo tur sa a nih thu a sawi a, "Kan party mi leh sate theih­tawp min chhuahpuiah ka sáwm a che u. Hneh ngei turin ka ṭang dawn a ni," a ti. 



Share this Post

Login to comment
No Comments