Kângmei vên dan turah inráwnkhawm

Champhai District Level Committee on Fire Prevention chuan, tun hnai khan Champhai DIET-ah kângmei vên kawnga inzirtirna leh inràwnkhawmna hun an buatsaih.

Champhai district forest officer (DFO) C Lalbiaka chuan, kângmei chhuah chhan leh a nghawng hrang hrangte a sawifiah a, "Ram kâng ven kawngah uar leh zuala zirtir a ngai tak zet. Tun ang zela ram kâng a tam chuan nakin lawkah ram chereu leh chhawrtlak loh tam tak kan neih phah dawn a ni," a ti.

Inràwnkhawmnaah hian sorkar official, tlawm­ngai pawl, V/C, zirna-in leh mipui tih tur zirho a ni a, chak zawk leh awmze nei zawka ram kâng ven a nih theihna tura hmalakna turte an sawiho bawk.

Environment, Forest & Climate Change (EFCC) department tar­lan danin, Champhai dis­trict hi Mizorama district zinga forest cover nei zím ber dawttu a ni a; district zau zawng aṭangin 81.73% chu forest cover niin, Mizoram pumpuiah forest cover chu 86.27% a ni thung.

Inràwnkhawmnaah hian EFCC department-a thawk te, zirlai te, Cham­phai Sub-Hqrs. YMA hnuaia Science & Envi­ronment Committee member te, Champhai Na­ture Conservancy member te, AMFU member-te leh Zotlang Branch YMA hruaitute an tel a ni.



Share this Post

Login to comment
No Comments