Kolasib DEO/DC lakah FIR thehluh a ni

Kolasib All NGO Coor­dina­tion Committee chuan February 9, Inrinni khan Kolasib district election officer (DEO) Dr Arun T lakah, district bawrhsap lakah Kolasib Police Station-ah FIR an thehlut. Kolasib NGO-te chuan, Kolasib DEO chu dan dik loa Tripura relief camp-a Bru-te electoral roll-a thunah an puh a ni.

Kolasib NGO-te chuan Dr Arun T chu dan loa electoral roll ennawnna kalpuitu nia an hriat avang te, High Court-ah affidavit dik lo (false affidavit) a thehluta an ngaih avangte hi a thil tih dan dik lote chhuichhuak a, dan anga a chunga hremna lek turin an ngen a ni.

Kolasib NGO-in FIR-a an tarlante

1.Mizoram MLA General Election 2018 neih zawh tâkah khan thil dik lo eng eng emaw a awm niin a lang a, a bikin Kolasib district chhung 

Assembly constituency pathum - Tuirial, Kolasib, Serlui huam chhunga electoral roll buatsaih a nih danah thil fel tâwk lo awma hriat a ni. He election inpuahchahnaah hian Election Commission of India kaltlangin neih a ni.

2.Hemi chungchanga hmalak­naah hian Electoral Roll Revision pawh ni 31.7.2018 khan draft-in rule 10, Registration of Electors Rules, 1960 angin chhuah a ni tawh. Ni 7.8.2018 leh 17.8.2018 inkar chhung hian mi 911 hnen aṭangin constituency pathum huam chhung aṭang hian roll-a thun dilna dawn a ni. Mi 911-te hi ERO chuan a lo hnâwl tawh. Heti chung hian roll-ah chuan mi 206-te chu thun an ni ta tho a, he thutlukna an siam hi duh loin Gauhati High Court, Aizawl Bench-ah writ petition, WP(C) (PIL) No. 136 of 2018 thehluh a ni.

WP(C) (PIL) No. 136 of 2018-ah chuan affidavit-in opposition chu DEO Kolasib chuan Court-ah a thehlut a, chu affidavit-in opposition para 3-naa tarlan dan chuan, appeal 471 lutin, October 12-14, 2018 khan DEO office-ah hearing neih a ni. Hearing-ah hian appelant (diltu)-te an lang lo a, ERO leh AERO-te inlan anga tarlan a ni. Mahse, a tak takah chuan ERO/AERO-te hi appeal hearing-naah an tel lo a, chuvangin Court-ah hian DEO hian false affidavit a thehlut niin a lang.

3.False affidavit a pek avang hian IPC Section 181/199, etc. anga hrem theih a ni a, chubakah DEO hian a hmuna enfiah tur hian SDM, Kolasib chu ni 1.10.2018 khan a tír a, hei hi appeal a luh hma niin ni 29.9.2018 khan SDM, Kolasib hian Bru Transit Capms-ah hian document-te zuk  dawng vek tawh angin affidavit-in opposition para 3 leh 4-ah a ziak lang bawk. Hengte hi thil in mil thei lo a nih vangin false statement hi a awm ngei a ni tih a chiang hle.

4.Roll siam chungchanga appeal lut nia an sawi hi dan anga pawm theih niin a lang lo. Dan ang chuan miin amah ngei kalin emaw, post office kaltlangin emaw, online-in emaw appeal a thehlut tur a ni. An awmna hmuna kalchilha appeal-na lak khawmsak hi dan kalh a ni. Hetianga electoral roll buatsaihna hi dan loa hmalakna a ni. Chuvangin, hre reng chunga dan loa thil tih lian tham tak a awm nia a lan avangin chhui chian a ngai hle a ni.

5.Appeal-na lehkha nia langte hi Gauhati HC, Aizawl Bench-ah DEO hian affidavit hmangin a thehlut a, chutah chuan hming sign awm lote leh residence proof awm lote pawh lo pawmsak a ni a, hei pawh hi dan kalh a ni.

6.Final electoral roll hi 14.11.2018 thleng khan vantlang chhiar theihin pholan a nih thu affidavit-in opposition-ah hian tarlan a ni a, hei pawh hi thu dik tawk lo a ni. Hetih hun lai hian en tuma kan dil pawhin DEO hian a remti ngai lo.

7.A lan danin, DEO hian dik lo takin electoral roll a siam niin a lang, High Court-ah dik lo takin evidence a pe bawk.



Share this Post

Login to comment
No Comments