CM hoin mau chi phun dan tur sawiho

February 8, 2019 zan khan chief minister Zoramthanga chuan Chief Minister's Office (CMO) conference hall-ah Energy Plantation Consultant-a bamboo consultant Dr N Barathi leh Eco-Nexus advisor Hae-Bong Cheoung te a kâwm a, Mizorama mau ṭha chi tam tham tak phun leh tihpun dan tur a sawipui.

Chief Minister chuan, industry hrang hrangah mau mamawhna a san thu sawiin, "Mau hi hun rei lote chhunga puitling zung zung a nih bakah, environment lam leh sum lama hlâwkna tur thlir pawhin a ṭha hle. Chutihrual chuan, chi chhuah zen zen lo a nih avangin tam tham taka mau hmun siama phun tur chuan science thiamna hmanga tihpun a ṭul a ni,"  a ti.

Zoramthanga chuan, Dr N Barathi-in mau chi khat - Dend­rocalamus Brandisii variety chu hlawhtling takin tissue culture tiin kum nga chhung a beih hnuah a tihpunsak thu sawiin, "Hmabakah chuan kalphung mumal tak neih a ṭul," a ti a; mau hmun tur buatsaih te, lei ṭha leh tui lakna ṭha te, mau hmun kara hmun âwla hmang 

ṭangkai tura thlai dangte chìn tel dan leh thil tur dang awm tur te sawiho fel chu hmabak a nih thu a sawi.

Dr N Barathi chuan, Horticulture department hotute chu Mizorama mau chîn dan kalphung a sawipui a; a hnathawhna Growmore Biotech Ltd. hmunhmá tlawh turin a sáwm.

Hae-Bong Cheoung pawhin thu sawiin, an company-in mau aṭanga fuel an siam chhuah ṭhin thu a sawi a, "Fuel siamna atan hian engtik lai pawhin mau tam tham tak kan mamawh reng a ni," a ti. 



Share this Post

Login to comment
No Comments