Mizoram sorkar hian CAB hi A vei tak tak lo - MZP

MZP chuan Inrinni khan an pisaah thuthar thehdarhtute an kâwm a; Mizoram sorkar chu The Citizenship (Amendment) Bill, 2016 (CAB) vei tak tak loa an ngaih thu an puang.

MZP president L Ramdinliana Renthlei chuan, CAB pass a nih lohna turin India sorkar karna atan Mizoram pumah Republic Day boycott tumin NGO Coordination Committee a inbuatsaih tih sawiin, "Hetih lai hian Mizoram sorkar chuan Republic Day boycott lo hram turin min ngen a, Chief Minis­ter hoa sorkar official leh NGO meeting ṭum khan Pu Zoram­thanga chuan, 'Republic Day hi in boycott chuan sorkar tharte kan la ni si a, central sorkar hian President Rule-ahte min dah anga , sorkar hi che thei loin min siam palh ang tih a hlauhawm' a ti a ni," a ti.

CM-in, 'CAB hi kan duh loh tlan vek a ni. Inkhel ang kan ni a, ballboot min buntir ve phawt ula kan khelho dawn nia, kan tum a inang vek a, kan pet goal theihna turin ballboot hi kan bun ve phawt a ngai a nia,' tia a sawi thu tarlangin L Ramdinliana chuan, February 12 hian Rajya Sabha-ah CAB pharh tum a nih tawh laia tun thlenga sorkar anga CAB sawihona a la awm loh avangin Mizoram sorkar chu CAB vei tak tak loa an ngaih thu a sawi.

MZP President chuan, NGO-te'n Chief Minister chu ballboot an buntir hnuah pawh sorkar angin sawihona emaw dodalna emaw lian tham a awm lo chu pawi an tih thu sawiin, "Hetiang a nih chuan ballboot inbuntir hian awmzia a awm dawn lo hleah kan ngai a, kan pet goal thei dawn lo. Sorkar chet a hun ve tawh. NESO chuan CAB hman a nih loh nan hma a lak chhunzawm zel dawn a, hemi kawngah hian Mizo mipui zawng zawng thlâwpna leh ṭawngṭaipuina kan ngen a ni," a ti.

MZP hruaitute chuan, CAB pass a nih lohna atana theihtawp an chhuah laiin, sorkar laipui dawra kal Mizoram minister pakhatin CAB chungchanga NGO-te chet dan chu atthlak a tih thu Delhi-a kal MZP hruaitute bulah a sawi tih an sawi a, "Kan rilru a tina hle. Minister hian CAB hi pass tum a nih loh thu sawiin, NGO-te chu a hun laia hma la si lo a, tlai khaw hnuah hma laah min puh a ni," a ti a; minister chu CAB pass a nih dawn loh thu a hriatna puangzar tura an phût thu an sawi. 

MZP-in thuthar thehdarhtute an kawmnaah hian CAB pass a nih lohna atana NESO bultuma India rama political party hrang hrang hruaitute kawma Mizoram aṭanga zin MZP vice president B Vanlaltana leh NESO finance secretary Ricky Lalbiakmawia ten an zin chanchin an sawi a ni. 



Share this Post

Login to comment
No Comments