The Citizenship (Amendment) Bill, 2016 Duh lohna kan lantir hmasa ber - Cong

Congress party chuan thuchhuah siamin, Mizorama political party zingah Congress party chu The Citizenship (Amendment) Bill, 2016 duh lohna lantir hmasa ber an niin an tarlang a; Rajya Sabha-a bill dodalna kawngah Ronald Sapa Tlau, MP hmalakna leh thawhrimna chhuanawm an tih thu an sawi.

MPCC thuchhuah chuan, August 11, 2017 khan khatih laia chief minister Lal Thanhawla, MPCC president-in Joint Parliamentary Committee (JPC) on the Citizenship (Amendment) Bill chairman Dr Satyapal Singh, MP hnenah Bill chu India hmarchhak state-te tan a him loh thu a thawn tih sawiin, "Mizoram tan bik pawh dan loa Chakma foreigner Bangladesh aṭanga lo lutte avangin a ṭhat loh thu a lo thawn tawh a ni," an ti a; chu thu tho chu July 31, 2017-ah Law & Justice minister Ravi Shankar Prasad a thawn bawk tih an sawi a ni.

MPCC chuan, nikum, 2018 kum chanve hnu lamah The Citizenship (Amendment) Bill, 2016 chungchanga thawm a awm leh pawhin Lal Thanhawla'n Congress Bhavan-a August 10, 2018-a inkhawmah, 'Citizenship (Amendment) Bill-ah pawh sorkarin hma la daih tawhin, Central hnenah ziakin kan lo thlen tawh. Tuna Assam-a NRC chungchangah pawh fimkhur turin ramria kan checkgate-a duty-te kan chah lâwk daih tawh a ni,' tiin a sawi niin an tarlang. 

Congress party chuan, Lok Sabha-in The Citizenship (Amendment) Bill, 2016 a pass chu vanduaithlak an tih tak zet thu sawiin, "He Bill duh loh vanga NDA-a BJP-te nen a thawkho, India hmarchhaka tualṭo party Asom Gana Parishad (AGP) leh Meghalaya-a rorel lai National People’s Party (NPP) ten BJP an thawhpuina an hnûkdâwk hi an hnam himna thilah an ti tak hle tih an lantirna niin kan ngai," an ti. 

MPCC chuan, MNF president Zoramthanga, chief minister-in The Citizenship (Amendment) Bill, 2016 an duh loh thu sawiin, January 8, 2019-a MZP-in total bandh an siam chu an thlawp tlat tih sawi siin, India hmarchhaka tualṭo party dangte'n BJP nen an thawhhona an chhu chat a, thu mai ni lo, a tak ngeia chêt an la ang hian, MNF hian Bill hi an duh lo tak zet a nih chuan, NDA/NEDA-a BJP nen an thawhhona hi engtia kalpui zel nge an tum tih kan zawt ngal a ni," an ti bawk. 



Share this Post

Login to comment
No Comments