Blood processing fee tihtawp a ni Mipui chhâwk zângkhai duh vang - Dr Thangtea

Nimina Council of Ministers meeting chuan Mizoram sorkarin thisen sawngbawl­na man, blood processing fee a lak chu tihtawp a rel a, hman nghal tura tih a ni. Health minister Dr R Lalthangliana chuan, "Mipuite chhâwk zângkhai kan duh vanga blood processing fee lak ṭhin titawp kan ni," a ti.

Council of Ministers hi nimin khan chief minister Zoramthanga hoin Chief Secretary's conference hall-ah an ṭhukhawm a; sorkar department hrang hrang aṭanga rawtna (agenda) hrang hrang lutte an ngaihtuah.

Cabinet meeting chuan, Mizoram chhunga recognized blood bank (State Blood Transfusion Council-in a pawmpui blood bank)-a thisen hman dawna a hmangtu turte'n blood processing fee unit khatah Rs. 550 an chawi ṭhin chu tihtawp nghal an rel a; thisen chu a mamawhtu damlote hnenah a thlawn veka pek chhuah turin an rél. Thisen dawngtute'n processing fee an chawi ṭhin chu Mizoram sorkarin a tumsak vek dawn a ni.

Cabinet meeting thutlukna chungchangah hian Health & Family Welfare minister Dr R Lalthangliana chuan, blood processing fee chu miretheite hmakhua ngaia titàwp an nih thu sawiin, "Blood processing fee unit khata Rs. 550 pek tur nei lo mirethei tam tak an awm a, kha leh chen harsa taka thisen hmanna atana an lo senso tawh chu Cabinet chuan ṭha ti loin a titawp a ni," a ti a; senso tur tam viau mah se, mipuite chhâwk zângkhai an duh vanga thutlukna siam an nih thu a sawi.

Thisen dawngtute hnen aṭanga blood processing fee, unit khatah Rs. 550 zel lak hi State Blood Transfusion Council (SBTC) chuan kum 2014 khan a rêl a; khatih laia Health minister Lal Thanzara pawhin June 14, 2014-a Aizawla World Blood Donor Day hmannaah SBTC thutlukna chu puangin, sorkar laipui duh dan angin, thisen dawngtute aṭangin processing fee lâk a nih dawn thu a lo puang tawh.

SBTC-in blood processing fee lak tura a rêl hun hi 2014 kum tìr lam deuh ni mah se, Health & Family Welfare department chuan December 2014-ah order a chhuah a, January 2015 aṭangin a tak takin a tak taka processing fee lak ṭan a ni.

Association for Voluntary Blood Donation (AVBD) hruaitute sawi danin, Mizorama voluntary blood donation hi 90% chuang a kai hman a, mahse, blood processing fee lak ṭan aṭangin a tlahniam a, tun hnai kum hnih vel aṭang khan voluntary donation chu a sang zawngin a kal leh ṭan a ni. 



Share this Post

Login to comment
No Comments